Perintah meri vaksin Covid-19 ngambi semua rayat likun

PANDEMIK Covid-19 udah ngeruga pengelantang enggau pengelikun ba serata dunya sereta igi penyakit tu balat ngerekai. Naka tu, urung 110 juta iku orang udah kena rampit enggau kes pemati manggai 2.5 juta ba serata dunya.

Bisi peluang kini kitai ulih idup lantang bala selama enggau nengah pemisi vaksin Covid-19 tu? Peranak ba serata dunya nyengkaum 2.8 juta rayat Sarawak diatu benung diberi vaksin dikena nentuka semua kitai ulih idup lantang baka selama.

Nya alai, kitai deka ngelansa silik pasal kebuah kes Covid-19 di Sarawak majak nambah enggau inisiatif baka ni deka nentuka vaksin nya ulih mujur disadung nengah chara berenggat. Aram kitai beratika randau Sapit Kepala Menteri ti mega Chairman Komiti Penyangga Penusah Nengeri (JPBN) Datuk Amar Douglas Uggah Embas nengah program randau Twenty-30 begulai enggau Felo Kanan Kaunsil Profesor Menua, Dr Jeniri Amir apin lama ke udah.

Diatu kes Covid-19 nambah ngenyit lebih 7,000 kes diatu, nama pengilap?

DATUK AMAR DOUGLAS UGGAH EMBAS

Gelumbang keempat pandemik Covd-19 di Sarawak taun tu balat ngerekai dibanding taun 2020 ke alai Sarawak semina ngerikod 1,117 kes. Tang kenyau ari bulan Januari nyentuk diatu, kes nambah ngenyit lalu semua tu bepun ari Sibu.

Taun nyin kemari, kes ba Sarawak bepun ari kes import. Kitai bisi netapka polisi, sida ke tama kitu deka dikuarantin dulu sekalika datai ari Semenanjung Malaysia, Sabah tauka menua luar berengkah ari 3 Oktober 2020.

Tang polisi netapka kuarantin tu bepanggai ba penyampau bilik hotel enggau kekadang suntuk bilik hotel endur kuarantin laban bepanggai ba penyampau penerebai bilun ti tama ke Sarawak.

Ari nya, bisi penanggul baka ti nyadi di Sibu ketegal mayuh penerebai tama kitu enggau penyampau orang ti kitu. Nya kebuah polisi ditukar ari dikuarantin ba hotel enggau ba rumah, tu ngujungka Kluster Pasai nyentuk diatu ti udah ngerikod lebih 2,600 kes.

Kedua, bepun ari kampar ti tama ngena jalai chit tang utai ke balat ngasuh kitai tekenyit nya bisi 248 buah rumah panjai kena rampit dibanding semina sebuah rumah panjai aja kena rampit ba taun 2020.

Kes tu jampat ngerekai ba rumah panjai bekaul enggau adat. Ambika chunto enti bisi penusah rabat ngujungka mayuh kaban belayan ditesau datai ngabas penusah nya. Sida begulai, begelumu lalu enda nemu igi penyakit nya udah ngerekai.

Beduduk ari nya, perintah diatu nyendiaka Atur Pengawa Standard (SOP) ke alai natak semina 30 iku aja dikemendar ngulu penusah rabat lalu pekara tu nerima timbal ke chukup manah ari mensia mayuh.

Kelimpah atur diterit ejensi bekaul, kaban belayan ti dituntung penusah mega nemu ukai reti sida enda bebasaka sida ke udah nadai tang diatu, isu pengelikun mesti dikemerat.

Aku ngarapka KMKK enggau JKKK bela ulih bejalaika tanggung pengawa ngambi SOP semampai dititihka mensia mayuh.

Ulih Datuk Amar nerang pasal strategi tauka inisiatif baka ni kes Covid-19 ba rumah panjai diatu majak nurun?

DATUK AMAR DOUGLAS UGGAH EMBAS

Lebuh rumah panjai nya ditemu bisi kes positif, kami terus netapka rumah panjai nya bepekul enggau meresa semua peranak dia taja semina siku ditemu positif.

Pengawa baka tu ngemuntangka kami nyidi kes positif lalu enti sida ditemu positif, kami terus nganjung sida ngagai sepital. Sida ke nadai kena rampit nya deka diasuh kuarantin ba rumah panjai.

Strategi tu chukup manah dipejalai laban sida diasuh bepekul, taja bisi positif tang igi penyakit nya enda balat ngerekai. Nya kebuah, ari 248 buah rumah panjai ti bepekul sebedau tu, 116 buah udah nadai bepekul agi lalu tinggal 98 buah rumah panjai agi nganti gerah.

Nambahka nya, kami endang negapka pangku pengawa tuai rumah nengah program polis komuniti ke alai sida beempu tanggung pengawa nyaga sida serumah. Ukai ketegal takut kena ukum tauka ditangkap tang nya dikena nentuka pengelikun sida sebilik enggau mensia mayuh.

Pemisi vaksin diatu disadang mukaska igi penyakit Covid-19, nama inisiatif Perintah Sarawak ba pekara tu?

Sigi amat, tu mih utai dianti ba serata dunya nyengkaum rayat ba Bumi Kenyalang. Nya alai, Kepala Menteri Datuk Patinggi Abang Johari Tun Openg udah ngasuh kami numbuhka siti komiti ngambi merambu pengawa betuchuk vaksin di Sarawak.

Sarawak tu besai lalu kami mesti ngaduka pengawa nganjung vaksin laban ukai semina peranak ba mengeri ti deka nerima vaksin nya tang mega ba menua pesisir.

KKM udah bejalaika ‘dry run’ (atur nguji) mai chunto vaksin ngagai Belaga kena 20 Januari tu tadi. Kebuah pia laban vaksin ti dikena kitai nya Pfizer-BioNTech mesti disimpan ba palan dikumbai Ultra Cold Freezer enggau penyelap -75 darjah celcius. Nya kebuah, Sarawak bisi tujuh palan disedia endur engkah peti simpan nya. Ba timpuh lima jam, vaksin nya mesti diguna.

Nama inisiatif bukai?

Sida udah nyendiaka perengka pengangkut lalu genap JPBB udah mantaika perambu dini vaksin nya deka disedia ngagai rayat enggau bansa perengka pengangkut ti dikena ngambi datai ba palan nyimpan vaksin nya.

Lebuh bejalaika pengawa betuchuk vaksin ila, kami begunaka mayuh pengereja ngambi matau enggau nyaga pengelikun laban mesti nyaga takah.

Kami mega nentuka nadai penanggul nyadi baka diripotka ejensi berita entarabansa di Amerika Syarikat (AS), menua pemadu maju tang siku rayat iya nganti tujuh ngagai lapan jam endur betuchuk vaksin ketegal atur enda ditegap.

Nya kebuah, kami naka ulih nyeliahka pekara tu nyadi lalu kami mega deka nentuka rayat enda nganti lama kelimpah kami deka nyendiaka palan ti likun.

Nama pemar ditapi bala staf opis pengerai?

Staf opis pengerai mesti nelebaka diri kelebih agi sida ti diasuh meri tuchuk vaksin nya ngagai mensia mayuh laban pengawa betuchuk vaksin Covid-19 nya pekara baru.

Nitihka penerang, sida mesti nitihka atur ke udah ditetapka maya pengawa meri tuchuk vaksin nya. Pia mega, entara pemar bukai iya nya baka ni kitai ulih nentuka vaksin ti dibai ngagai menua ulu meruan manah.

Nambahka nya, pemar bukai baka isu vaksin chukup tauka enda laban kitai udah ngaga pemutus pengereja menua luar mega deka dituchuk vaksin laban manggai 2.01 juta iku orang Sarawak beumur 18 taun enggau tuai ari nya ulih nerima vaksin.

Nama penemu Datuk Amar pasal tiga kategori mensia iya nya sida ti sedia betuchuk vaksin, antivaksin sereta sida ti nyakal?

Sigi amat, bisi sekeda udah sedia enggau agi kakang ati sereta bisi mega antivaksin. Tu mih entara pemar ditapi perintah sentang baka ni nentuka penemu pasal pemanah vaksin enggau pekara saintifik dibantai ngagai rayat ngambi sida nemu pemanah betuchuk vaksin.

Kami mega deka muai semua penemu ke enda patut dibantai sebelah media rama tauka surat kabar. Nya kebuah, kami numbuhka raban pakar ti dipasuk 10 iku saintis betuaika Dr Andrew Kiyu. Sida tu ngembuan pangku pengawa meri penemu ngagai Perintah Sarawak pasal bansa vaksin ti deka dibeli enti Perintah Sarawak deka meli vaksin nya.

Kedua, nyadi penyanding penemu nerangka isu ke nyadi nyengkaum mantaika pemanah vaksin ari sukut penemu sains sereta peneleba ba menua bukai.

Kami milih bala lutur enggau saintis laban sida ngembuan penau. Enti kaban politik meri penerang, mayuh isu deka nyadi. Nya kebuah kami ngaga pemutus baka nya lalu tiga renggat pengawa betuchuk vaksin deka dipejalai ba Sarawak.

Keterubah, bisi 97,000 iku raban terabai komuniti deka dituchuk vaksin ditangkan renggat kedua iya nya raban kedua nya orang tuai beumur 60 taun enggau tuai ari nya sereta bisi penyakit.

Udah nya, raban ketiga ungkup rayat Malaysia ke bukai. Taja pia, perambu nya bepanggai ngagai penatai vaksin nya ba menua tu. Aku ngarapka rayat anang mendingka berita ngerimbas pending baka apin lama, bisi orang ngerembaika berita bula pasal kebuah deka nuchuk orang Belaga dulu.

Tuju KKM milih Belaga endur pengawa ‘dry run’ laban vaksin ti dikena kitai nya mesti disimpan dalam Ultra Cold Freezer enggau penyelap -75 darjah celcius.

Nya kebuah kami deka meda sekalika vaksin nya ngasi enti dibai ngagai endur ti jauh baka Belaga ti begunaka timpuh pejalai tujuh jam ari Bintulu.

Pekara tu ti deka diperati KKM lalu lebuh nya nadai siku orang ti dituchuk vaksin, semina dipeda bakani chunto vaksin nya disimpan dalam endur nya tadi, udah nya dipindah ngagai peti ais sekalika tan tauka enda pengelama empat ngagai lima jam. Enti tan, nadai isu nyadi lalu semua rayat ulih ngena vaksin Pfizer-BioNTech nya ila.

Nama kebuah rayat Sarawak mesti nerima vaksin?

Kitai nadai pilih laban tuju perintah ngarapka rayat Sarawak likun. Enti beratika vaksin bukai baka vaksin rengga, enti ngambi vaksin nya kitai ulih nyeliahka diri ari kena rampit igi penyakit rengga. Sama mega enggau vaksin Covid-19 tu, enti vaksin udah diberi, kitai ngarapka igi penyakit nya enda ngerampit laban tubuh kitai tan ngelaban igi penyakit nya. Arapka udah tu kitai ulih idup enggau ngereja pengawa baka selama.

Ba renggat Perintah Sarawak, nama inisiatif nentuka rayat enda irau kelebih agi ari sukut penyambung mensia mayuh?

Kami mega udah numbuhka siti komiti betuaika Unit Komunikasyen Perintah Sarawak (Ukas) enggau ejensi bukai nyengkaum Opis Penabur Malaysia (RTM) enggau ke bukai nyadika pelasar ngenataika pesan digaga Opis Pengerai begulai enggau raban pakar tadi.

Sida deka nerangka pemanah vaksin, bekunsika peneleba ba menua bukai ngambi orang Sarawak bulih berita ti betul bepelasarka penemu sains lalu ukai berita bula lalu penerang nya ila deka dibantai nengah bemacham bansa jaku.

Baka ni Datuk Amar meda teladan ari pengerekai Covid-19 sekalika ngagai rayat tauka Perintah Sarawak?

Utai ke diasaika kitai kenyau ari pun taun 2020 nya enda kala diasaika semua kitai sebedau tu. Ari utai ke nyadi, Sarawak mujur nagang pengerekai Covid-19 dibanding menua bukai.

Kesatu, kitai ngembuan ketuai ti tegap penemu enggau keran nagang pengerekai igi penyakit tu lalu ngereja pengawa bepelasarka penemu sains. Abang Johari meri sukung tegut sekalika ari sanding penemu tauka agih belanja lalu aku nemu rayat Sarawak udah nemu agih belanja dipelanja

Perintah Sarawak, ambika banding kitai udah ngena agih belanja RM72.2 juta ungkup belanja hotel ti nyadi palan kuarantin taun nyin tadi. Kedua, Sarawak bisi JPB ba renggat nengeri nyentuk renggat bagi menua ke alai sida bisi peneleba enggau meri kerejasama penuh.

Kenyau ari pun taun 2020, kitai baum ninting hari, semua meri kerejasama enggau sama belajar ngambi nagang pandemik ba menua tu. Aku pechaya rayat meri pengandal ngagai kitai lebuh kitai ngembuan ketuai ti tegap penemu enggau bepelasarka penemu sains, seruran meri sukung tegut sereta ngembuan mayuh staf opis pengerai.

Rayat mega mesti bejalaika tanggung pengawa laban program kitai deka puntan enti sida enda nitihka SOP baka enda ngena sengkabung mua taja perintah udah nyendiaka agih belanja, SOP enggau inisiatif bukai.

Nama perambu dudi hari enti penusah baka tu nyadi baru?

Kitai mesti negapka komiti baka JPBN lalu kitai begunaka palan penyakit berampit di Sarawak ngambi sida ti ngembuan penau ulih napi sebarang penusah ke tau nyadi dudi hari.

Pia mega, kitai mesti nyeleti perengkaguna ba palan pengerai laban dalam gelumbang keempat pandemik tu, kitai enda napi penanggul suntuk perengkaguna baka Unit Sakit Raya (ICU), suntuk katil nyentuk kitai nyendiaka Palan Kuarantin enggau Ngubat Covid-19 (PKRC).

Perintah diatu mega udah nambahka perengkaguna baka ba ICU Sepital Sibu diatu udah ditambah 13 katil dibanding suba semina bisi 17 katil aja.

Nambahka nya, penyampau orang ti diperesa mega udah ditambah. Diatu, kitai ulih meresa manggai 6,500 iku enggau sektor peribit dibanding suba kitai semina ulih meresa lebih 4,000 iku sehari. Tu ngujungka chunto sel ari liur mesti nganti enam ngagai tujuh hari ngambi nemu pemutus iya lalu pekara tu enda manah laban kelalu laun ditemu pemutus.

Nya kebuah, diatu kami netapka Indek Atur Pengawa (KPI) ngambi pemutus peresa ulih ditemu ba timpuh 48 jam aja.

Nama juluk ati Datuk Amar?

Aku ngarapka rayat Sarawak seati enggau terus meri kerejasama ba sebarang penusah ke tau nyadi udah tu. Baka ti disebut aku tadi, kitai ngembuan ketuai ti tegap penemu baka ngiring enggau nyerakup rayat maya penusah besai tu.

Aku pechayaka kitai ulih beserakup nentuka Sarawak terus maju manggai taun 2030 pengudah Covid-19 tu pukas.

Suara Sarawak