Perintah nambahka agih RM5 juta dikena ngaga Kompleks Lumba Balai Ringin

BALAI RINGIN: Beratika pemaik raban nembiak dudi hari dia Kepala Menteri Datuk Patinggi Abang Johari Tun Openg ngemendarka agih belanja tambah RM5 juta dikena ngaga Kompleks Lumba Balai Ringin.

Ku iya, empas ari ubah gaya tanah enggau tanah paya ba palan kompleks nya, agih belanja RM10 juta ti dikemandarka sebedau tu bedau chukup.

“Laban ngira raban nembiak rebak baru ti begunaka palan tu ungkup aktiviti lumba tauka program ti meri pemaik, nya alai aku ngemendarka agih belanja tambah RM5 juta munyi ti dipinta pengari rayat kita.

“Sitak Balai Ringin ngembuan mayuh sekula besemak, sida suah ngatur program lumba ninting taun tang napi penanggul nadai palan belumba tauka stadium, nya alai aku ngemendarka kompleks lumba digaga ditu taja pan Balai Ringin tu pelilih mit,” ku iya.

Abang Johari bejaku munyi nya rambau Program Nasih Tanah Kompleks Lumba Balai Ringin ditu, kemari.

Abang Johari bejaku rambau Program Nasih Tanah Kompleks Lumba Balai Ringin ditu, kemari.

Ku iya, peranak ba pelilih Serian, Simunjan enggau Sri Aman deka bulih pemaik pengudah Kompleks Lumba tu udah tembu digaga ila.

“Semua tu datai ari runding bala tuai Perintah Sarawak empu. Pia mega, semua tu ulih nyadi nyata laban tuai menua ngembuan visyen ti tegap.

“Lebuh infrastruktur tu udah tembu digaga ila, rayat ba Balai Ringin ulih ngerembaika servis dagang temuai enggau ekonomi sida,” ku iya.

Berebak enggau nya, Abang Johari mega madahka ba taun 2024 sitak Balai Ringin deka nerima 100 peratus bekal ai beresi.

“Diatu semina 30 peratus aja udah nerima bekal ai beresi ke alai 70 peratus agi bedau.

“Sebedau ngatur pemansang bukai, rayat mesti nerima bekal ai beresi dulu.

“Taja ungkus belanja projek tu besai, tang ba baruh Gempung Parti Sarawak (GPS) pengawa nya deka ulih dipejalai,” ku iya.

Ngelansa pasal, Pelin Besai (Master Plan) Pelilih Mit Balai Ringin, Abang Johari madahka pansik deka dipejalaika ngambika pengawa nya ulih dilanggur enggau meruan.

“Penerang udah bisi magang, tang aku mesti mansik dulu, awakka enti udah tembu ila sitak tu deka nyadi palan ti manah.

“Pelin besai tu engkeman laban kita ngembuan siku pengari rayat ti bisi visyen,” ku iya.

Sama bisi datai Sapit Kepala Menteri Tan Sri Datuk Amar (Dr) James Jemut Masing, Speker Dun Datuk Amar Mohd Asfia Awang Nassar, Menteri Nembiak enggau Lumba Datuk Abdul Karim Rahman Hamzah, Menteri Muda Nembiak enggau Lumba ti mega Adun Balai Ringin Datuk Snowdan Lawan enggau ke bukai.

Abang Johari (tiga kanan) benung nyuaka setipikit tuai rumah ngagai siku penerima.

 

Pelin Kompleks Lumba Balai Ringin.

Suara Sarawak