Perintah Nengeri ngamatka semaya

BAU: Perintah Sarawak ngamatka semaya nyerahka Surat Pala Tanah ti dikeluarka ba baruh Seksyen 18 Kanun Tanah Sarawak (SLC) ngagai penerima ditu, kemari.

Lebuh bejaku, Kepala Menteri Datuk Patinggi Abang Johari Tun Openg madahka bisi 579 surat diserahka dikena ngentak rumah ti disukat nengah Program Nyukat Kampung Asal.

Ku iya, bagi tanah ti disukat ungkup betanam betupi dalam Pemansang Tanah Salcra surat geran tanah diserah ngagai 827 iku sida ti ngempu tanah NCR.

Iya ti datai maya Pengerami Ketuai Begulai enggau Rakyat di Padang Bazaar Krokong ditu, kemari seraya nyuaka surat pala tanah nya ngagai raban penerima.

Abang Johari madahka program nyukat tanah tu mungkur Kampung Suba Bau, Kampung Suba Buan, Kampung Suba Bandar, Kampung Tasik Biru, Kampung Skiat Lama enggau Kampung Skiat Baru.