Perintah nyaup Operator Taska, Tadika mayar gaji pengereja

KUCHING: Operator Taska enggau Tadika udah tau lantang ati pengudah Kepala Menteri Datuk Patinggi Abang Johari Tun Openg ngemendarka pakej kedua Bantu Khas Sarawakku Sayang (BKSS), kemari.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Seri Fatimah Abdullah madah, reti pemaik ari pinjau pechuma disebut Kepala Menteri iya nya dikena mayar gaji pengereja pengelama enam bulan.

“Pekara tu tentu meri pengelantang ngagai operator Taska enggau Tadika pengudah palan pelajar sida ditutup berindik ari pengerekai Covid-19.

“Nya alai aku ngarapka tiga piak; operator Taska enggau Tadika, apai indai sereta pengajar ulih berandauka pekara ngaul pengelantang sida.

“Pekara patut dikerandau lalu deka meri pemaik ngagai semua piak pengudah Atur Tagang Pejalai (PKP) dilanjar nyentuk 28 April,” ku iya ba sebengkah penerang tadi.

Ku Fatimah, Taska enggau Tadika tu dagang rama ke nyadi sistem sukung beguna amat ngagai apai indai ti bekereja.

Suara Sarawak