KUCHING: Bajet 2023 dipeda meri perati nyungkak ekonomi menua ti nerima empas bekau pengerekai pandemik Covid-19 sebedau tu.
Chairman Palan Pemansik, Pemansang Rama enggau Rampa Menua, Fakulti Sains Rama enggau Pekara Mensia Universiti Kebangsaan Malaysia (UKM) Prof. Dr Novel Lydon madah, penumbuh ekonomi ti kusut, kuasa beli rayat ti majak kurang sereta rega barang ti majak mar mesti diputar Perintah Penyerakup lengkas.
“Nya alai, aku meda bajet tu endang chara perintah nusun baru ekonomi menua, kelas rama enggau struktur rama rayat ngambi semua nya ulih ngerembai baru.
“Nya kebuah, bajet sekali tu entara bajet pemadu besai pemansang ekonomi ti kusut kelebih agi bekau ari perang entara Ukraine enggau Rusia nyengkaum pandemik Covid-19,” ku iya.
Novel meri sadang penemu nya lebuh ditanya Suara Sarawak pasal Bajet 2023 ti dibantaika Menteri Besai Datuk Seri Anwar Ibrahim kena Hari Lima tu tadi.
