“Kitai ukai baka Kuala Lumpur … beri agih belanja tang udah nya, ambi baru. Nya ‘buruk siku’.”

GEDONG: Genap projek pemansang ke diperambu sereta disebut Perintah Sarawak ungkup rayat tetap digaga, ku Kepala Menteri Datuk Patinggi Abang Johari Tun Openg.

Ku iya, Perintah Sarawak ukai baka perintah besai dibaruh iring Pakatan Harapan (PH) baka ‘buruk siku’ iya nya udah ngemendarka sesebengkah projek pemansang tang udah nya dibatak baru.

“Kitai ukai baka Kuala Lumpur … beri agih belanja tang udah nya, ambi baru. Nya ‘buruk siku’,” ku iya rambau bejadika Pesta Gedong, kemari.

Kenu ku, Abang Johari, agih dikena ngaga projek Jematan Batang Lupar, Jematan Rambungan enggau Jematan Batang Igan ke udah dikemendar sebedau tu udah diambi perintah besai baru.

“Projek ngaga Jematan Batang Lupar ambika chunto, Datuk Julaihi Narawi udah ngaduka setengan tang, enda memukai perintah besai ngaga pemutus ngambi baru agih belanja.

“Ulah perintah besai tu dikumbai ‘buruk siku’ lalu sida endang perintah buruk siku,” ku iya.

Ku Abang Johari, iring enggau pegai orang Sarawak ukai baka sekeda ketuai ba renggat perintah besai laban projek ke udah disebut perintah Sarawak tetap deka digaga.

“Aku andal kitai ulih ngatika diri lalu nyema perintah besai deka matak agih belanja pemansang ba Sarawak, ni ku sida kitai ulih ngemansangka diri empu,” ku iya.

Berindik ari nya, ku Abang Johari, Perintah Sarawak diatu fokus ngemansangka nengeri nengah ejensi pemansang ke udah dibagi ngagai sekeda sitak.

Entara ejensi nya, Ejensi Pemansang Ulu Rajang (URDA), Ejensi Pemansang Tanah Tinggi (HDA) enggau Ejensi Pemansang Sitak Utara (NRDA) enggau ejensi baru iya nya Ejensi Pemansang Sitak Penuh Samarahan, (IRSDA)

“IRSDA deka fokus ngemansangka sitak Samarahan ke mungkur Simunjan, Gedong, Asajaya, Sebuyau enggau sitak besemak ba mayuh bengkah projek pemansang,” ku iya.