Perintah Sarawak meri peluang JKKK ngemujur projek RTP RM200, 000

SPAOH: Komiti Pengelikun enggau Pemansang Genturung Pendiau (JKKK) di Sarawak diberi peluang ngatur kediri Projek Transformasyen Menua Pesisir (RTP) penyampau RM200,000.

Sapit Kepala Menteri Datuk Amar Douglaa Uggah Embas madahka diatu sida dikemendar bejalaika kediri projek sida nya sekalika ngena pengawa beripai tauka nengah kunteriktor ke udah direjister dipilih sida.

Ku iya, tu siti ari chara dikena ngenegapka agi komiti lalu meri sida peluang ngatur lalu matau projek ke dipejalai kelebih agi projek ke kurang teknikal.

“Ejensi teknikal baka Opis Kereja Raya enggau Opis Sungai enggau Entaku Ai deka mantu sida nyendiaka kuantiti bill ungkup projek sida.

“BQ nya deka nentuka sukut projek enggau kereban nyengkaum taka ngepunka projek, ungkus enggau ke bukai,” ku iya.

Iya madah munyi nya lebuh baum enggau raban Parti Pesaka Bumiputera (PBB) di Dewan Komuniti Spaoh ditu, tadi.

Nya alai iya ngarapka raban komiti deka nyadi orang ke pemadu beguna ngagai pejalai sereta penembu projek nya.

“Kelimpah ari nya, kami ngarapka nadai timbal ti enda manah diterima ari projek ke dipejalai,” ku iya.