SIBU: Perintah Sarawak ngandalka Universiti Teknologi Sarawak (UTS) ulih ngerandang buah penemu baru ti inovatif dikena ngulihka pemaik ari sukut berekat penatai menua di Sarawak.
Premier Sarawak, Datuk Patinggi Tan Sri Abang Johari Tun Openg madah, rampa menua ti meruan nyadi kunchi pemadu beguna ngagai Sarawak laban ulih ngasilka ‘biofuel’ kelebih agi ungkup guna industri penerebai bilun ari lukut mit.
Ku iya, berekat nya ngujungka Sarawak nerima pemeranak puku di menua luar laban sida keran deka ngaul diri ba dagang tu ditu.
“Nya alai aku ngarapka UTS ulih ngerandang penemu baru bekaul pengawa ngena semua penatai tauka pengeraja asal ti bisi ba Sarawak tu,” ku iya.
Abang Johari bejaku munyi nya rambau bejadi Program Konvokesyen Ke-7 UTS ba Balai Canselor Tun Abdul Taib Mahmud, ditu kemari.
Ku iya, nengah pekara nya, perintah ulih beranakka puku ba sukut infrastruktur pelajar kelebih agi numbuhka sekula antarabansa ti bekualiti sereta ulih besemekih nunda singkang dunya.
