SARATOK: Sepenyampau RM144,796 agi belanja udah diagih dikena meri sukung betampung ngagai gerempung enggau kelab ba sitak Kalaka.

ADUN Kalaka, Mohamad Duri ngaku pangku pengawa gerempung ukai dikuasa perintah (NGO) ba bemacham sukut nya patut dibasa.

Ku iya, genap gerempung enggau kelab nya bela ngembuan juluk kediri empu.

“Pekara ti patut diaku tebal agi sida mantu ngenataika polisi perintah kelimpah mantu ngemansangka raban diselinting.

“Ambi ke chunto, NGO lumba mantu nempa mayuh atlit lalu pia mega NGO rama, jalai pengarap enggau ti bukai, kitai ngaku sida bela ngembuan pangku pengawa kediri empu.

“Nya alai, agih belanja perintah Sarawak ba baruh Projek Pemansang Mit Menua Pesisir (MRP) ti diagih ngagai 21 gerempung enggau kelab kelai sukung ari kitai (perintah),” ku iya.

Mohamad mansutka jaku nya pengudah Program Nyuaka Agih Belanja MRP ba Bilik Aum Opis Pelilih Saratok ditu, kemari.

Iya ngarap agih belanja nya ulih ngerichahka agi pejalai program ti udah diperambu sida sebedau tu.

“Aku empu chukup mereti enti nadai sukung ari perintah baka ni sida deka bejalaika program sida.

“Tang aku suah ngelalau genap NGO patut beratika program dipejalaika sida ngambi ulih meri empas besai ngagai komuniti lokal.

“Aku ngelalau sida ngambi begempung ngemansangka pengulih raban nembiak lalu ngembing raban tu nuju pekara ti manah dikena nyeliahka sida ari aktiviti ti enda bepengerai,” ku iya.

Iya mega ngelalau genap NGO ngambi lurus ati ngatur pekara wang sida.

Mohamad beterima kasih ngagai raban NGO ba sitak Kalaka enggau Pelilih Saratok laban mayuh udah mantu perintah.