Perintah sigi enda ngerampas tanah rayat

BINTULU: Perintah nengeri enda ngambi tanah sengapa munyi ke disebut sekeda piak.

Menteri Muda ba Opis Kepala Menteri ( Undang-Undang enggau Adat Bumiputera ), Datuk John Sikie Tayai, berasai ensiban lebuh ngenang piak ke majak ngajum rayat madah perintah nengeri deka ngerampas tanah Hak Adat Bumiputera (NCR) ke disukat ngena Seksyen 6 Kanun Tanah Negeri (Pindaan) 2018.

Kenu ku iya, ketuai raban bansa enggau tuai rumah udah suah dipadah enggau nyemetak perintah sigi enda ngerampas tanah rayat, maya proses nyukat tanah dipejalai nitihka Seksyen 6 Kanun Tanah Negeri (Pindaan) 2018.

Pengawa nyukat tanah nitihka seksyen nya, ku iya dipejalai dikena ngelai tanah NCR tauka dikumbai Domain Wilayah Pribumi (NTD) ari tanah nengeri (tanah perintah).

Tang, bisi piak majak nuduh perintah ngena Seksyen 6 Kanun Tanah Negeri kena ngambi tanah NCR, ku iya rambau nutup Program e-Profail Ketuai Raban Bansa enggau Tuai Rumah Pelilih Tatau, ditu, tadi.