Perintah tegap beguna dikena matak pedagang luar

LUNDU: Tuai raban bansa lebih agi ba Dun Opar dilalau terus meri sukung ngagai perintah Gempung Parti Sarawak (GPS) ke pengelantang nengeri tu.
Tukang Wang Parti Rakyat Bersatu Sarawak (SUPP) Datuk Francis Harden Hollis madah, nya beguna amat laban Sarawak begunaka perintah ti tegap ngambika ulih matak mayuh agi pedagang ari luar beranakka puku ditu.
“Aram mih kitai bela nyukung GPS dibaruh iring Kepala Menteri Datuk Patinggi Abang Johari Tun Openg.
“Kitai meda pemansang ba sitak Opar chukup lubah kenyau 2018 laban agih belanja ke nadai mayuh ungkup Projek Tranformasyen Menua Pesisir (RTP).
“Geran Projek Mit Menua Pesisir (MRP) mega nadai diberi ngagai Adun Opar kenyau 2018 laban pengari rayat diatu penyakal,” ku iya.
Ku iya, pekara nya utai ke dipilih pengari rayat nya empu lalu iya mai kuing politik ngelaban arus politik pemansang Perintah Sarawak.
Harden ke mega Pengintu Pendiau Komuniti madah munyi nya maya Pengawa Nyerah Tong Ai N.1 Opar di Balai Raya Mayuh Guna Kampung Bokah, Lundu, kemari.
Berebak enggau nya, Harden madah mayuh produk sereta bantu ari Opis Menteri Pengintu Pendiau, Pengelantang Komuniti, Orang Indu enggau Pemansang Anak Mit (KWKPK).
“Entara bantu ke suah disebut diatu iya nya Kenyalang Gold Card (KGC) laban nya meri pemaik ngagai orang ke megai kad nya baka ngasaika putung rega maya meli barang.
“Udah nya, orang ke sebilik enggau sida ke bisi kad tu ulih dibantu maya bisi rabat nengah Tulung Pengasih Rabat (BIK) penyampau RM3,000 dibayar perintah GPS,” ku iya.
Nangkan ke nya, bantu bukai baka Bantu Indu Beranak (BIB) penyampau RM450, kelimpah bantu RM1,000 disimpan ungkup anak baru ada. Nyadi bantu nya semina ulih diambi nganti anak udah manggai umur 18 tahun.