Permit Import Gula: Polisi nyiping rayat

KUCHING: Permit Import Gula patut dikinsil lalu meri pengelantang ngagai rayat ngasaika rega gula ti mudah dikena mantu ngurang belanja idup sida, ku Chairman Parti Sa’ati Rayat Sarawak (SUPP) Stakan, Sim Khiang Chiok.

Nengah penerang berita ngagai Suara Sarawak tadi, Khiang Chiok nanyaka rega produk kepenudi ba 11 pedagang pemakai enggau ai irup (F&B) dikurang enggau permit import gula, meli enggau rega mudah agi.

Iya nanya, nama kebuah 11 pedagang F&B diberi pengelebih lalu tu dipeda nyiping rayat enggau pedagang datai ari menua Kuching tu empu.

Khiang Chiok nyemetak madah, polisi permit import gula diperati nyiping orang bukai ti meli guna ba rega ti mar agi.

“Tu nunjukka Perintah Besai enda sinuka penusah rayat sereta nadai ati nyaup ngurangka belanja idup.

“Polisi Bekunsika Pemansang dibantai Perintah Besai enda dikemeran sida bepelasarka belanja idup tinggi diasai semua kelimpah ari 11 pemegai permit import gula di Sarawak,” terang iya.