ARTIKEL

GELAR… Racheal bulih perais Kanta Pemadu Manah.

Personaliti Racheal Sherryline narit ati

Facebook
Twitter
LinkedIn
WhatsApp
Telegram

PENGERINDU ba dunya pemajik gamal kenyau ari umur 15 taun udah meransang Racheal Sherryline kih nambah penemu enggau peneleba diri.

Muka randau, dara bajik Racheal madah, iya minat masuk pekit pemajik gamal maya agi besekula lalu ngelala dunya pemajik gamal tu laban suah meda di televisyen, media sosial enggau pekit kumang ti suah diatur.

NYAUT TANYA… Racheal andal nyaut tanya bala akim.

“Endang amat, aku rindu masuk pekit pemajik gamal maya agi besekula, lebuh nya baru beumur 15 taun.

“Rindu endar meda dara bajik mantaika pengelandik, pemintar enggau pemanah chara mai diri atas panggau.

“Tang kebendar, mayuh kebuah aku rindu lalu keran deka masuk pemajik gamal.

“Kesatu, rindu ninga saut bala dara bajik enggau bemacham tanya ari akim dikena nambahka poin sida.

“Kedua, pemanah pekayan asal dikena sida dikena narit perati mensia mayuh kelebih agi bala akim.

“Ketiga, chara mai diri atas panggau enggau ngasuh semua mata nuju pejalai sida disempulang enggau tuchum ti ngasuh kitai tekait ati.

“Kenyau ari umur agi biak, aku belajar lalu ku runding aku suba, enti udah chukup umur, aku deka nguji bepekit.

“Sigi ingin endar ati, empai berunding alah tauka menang, runding semina deka nguji baka ni bejalai atas panggau mai diri enggau nyaut tanya bala akim.

“Diatu, juluk nyadi nyata taja pen bedau ngenggam gelar champion.

“Enda ngawa, sigi baka kitai belajar, anang mudah putus pengarap tang terus pajuka singkang pengawa pengawa dikerindu kitai ngambi bulih peneleba berega,” ku peransang dara bajik asal ari Dalat.

INSPIRASYEN

Ditanya sapa ti nyadi inspirasyen, dia dara tampun puji nya milih Miss International Malaysia 2024, Cassandra Yap.

Ku Racheal, iya milih Cassandra Yap laban rindu meda pengelandik sereta pemintar nyentuk dipilih ngarika Malaysia ba pekit dunya nya.

Racheal Sherryline

Chara Cassandra Yap mai diri atas panggau endang narit ati Rachael, 22, nyentuk iya pen bechuntoka chara kumang dunya nya.

“Ukai mudah deka mai diri atas panggau laban semua mata endang meda kitai.

“Tang nya meh pemar ke meseti ditapi nentuka bala akim ulih meri poin ti patut nipakka chara kitai nyaut tanya enggau mai diri atas panggau,” ku Racheal meri penemu.

Dara memelan ti kala bulih gelar 1st Runner Up Ratu Pesta Kanowit 2022 nya madah, sekumbang masuk pekit kumang ti diatur ba menua tu, iya bulih mayuh penemu enggau pengelandik baru ngambi ulih nyingkang jauh agi ba dunya pemajik gamal.

Ditanya reti Beauty With Brain, Racheal madahka penemu diri leka jaku nya nya mai reti indu ukai semina dipeda ari pemajik gamal tang mega dipeda ari runding ngereja pengawa tauka ngaga pemutus.

NGUJI NASIP

Tambah mega ku iya, leka jaku nya nunjukka kitai indu patut semampai mantaika diri enggau personality ti manah enggau tuai runding.

“Semua kitai udah tentu bisi buah penemu enggau peragam kediri empu lebuh nyebut leka jaku Beauty With Brain laban leka jaku ngembuan besai bungkur enggau reti iya,” ku iya mantangka penemu diri.

Dara bajik nya mega madah, sekumbang masuk pekit pemajik gamal, iya mayuh belajar chara nyaut tanya enggau belajar ngembuan pengandal diri nengah pengawa berani bejaku ba mua bala mayuh.

“Maya nyaut tanya bala akim, nyau kesal asai ati tang naka ulih nyaut tanya enggau manah sereta nyemetak.

“Ari pekit ti dipasuk, aku naka ulih beratika pengilap enggau pengelemi diri empu.

“Aku mega belajar enggau bechuntoka penyereta bukai baka ngembuan ati ti baruh enggau enda mudah putus pengarap,” terang iya.

Naka diatu, iya kala masuk dua pekit pemajik gamal baka Pekit Ratu Pesta Kanowit 2022 enggau Pekit Ratu Etnik Vol.1 2024 Piala Justin Williamson Bridal’s Studio.

Nya kebuah, Racheal ngarapka agi bisi jereki masuk pekit pemajik gamal bukai dudi hari.

RETA CHUKUP BEREGA

Nampung randau ke dalam agi, Racheal mantaika penemu diri senentang adat enggau main asal nya pesaka ti enda ulih dibeli ngena duit ringgit tauka disimpan chara digital dalam telefon pintar.

Ku iya, main asal nya pesaka ti patut ditampung nengah pengawa belajar enggau ngasaika peneleba nengah daya idup, adat enggau main asal.

“Ba penemu aku, beguna endar adat enggau main asal tu ditampung rebak biak laban nya pesaka asal kitai.

“Sida enda patut malu belajar lalu patut temegah ngangkatka main asal nya ngambi majak diangkat sereta dikelala dunya.

“Anang sesekali ngembuan asai malu laban nya penatai asal kitai,” ku iya ti ngena pekayan asal etnik Kayan.

Ngenang pekayan asal etnik Kayan, iya madahka pekayan nya ngembuan baru chura lalu dijait ngena leka marik alus nitihka ukir ikeng enggau labuchi ti bisi reti kediri empu.

Iya madah baru, motif baju nya mega mandangka chura utai tumbuh enggau utai idup.

Pekayan asal nya ku iya, suah dikena maya pengerami melah pinang, ngambat temuai dipebasa enggau pengerami besai.

Nya alai, sebedau nyimpul randau, Racheal meri pesan ngagai rebak biak patut bisi pengangkun nyagu, ngetan, mekuh enggau ngangkatka adat, main asal enggau pesaka kitai.

BERITA LAIN

Rampa menua meruan beresi

Aum Parti-Parti (COP) Konvensyen Langkar Pengawa Ubah Klimet Gerempung Bansa Beserakup (UNFCC) ngempuru bemacham raban pemegai taruh antarabansa ari dunya dagang, perintah enggau komuniti sivil.

BERITA TERBARU

Umat Islam puasa Ramadan dua kali pada tahun 2030

Kalendar Hijriah Islam dihitung berdasar putaran bulan, manakala kalendar Gregorian atau Masehi dikira berdasar perjalanan bumi mengelilingi matahari. Justeru, ini menyebabkan umat Muslim berpuasa 36