Perunding inisiatif nempa nembiak menyana

KUCHING: Sepenyampau enam iku deligit ari Gerempung Pengajar Berejister Malaysia (PPBM) udah ngatur pejalai nemuai meri basa ngagai Opis Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit ba Begunan Baitulmakmur, ditu kemari.

Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit Datuk Fatimah Abdullah madahka pejalai nemuai nya laban deka meri penerang ngagai iya pasal pangku pengawa PPBM.

“Kitai berasai gaga laban penemuai tu peluang ke chukup manah endur sama bekunsika penemu sentang inisiatif ke patut ditambah ngambi ulih meri pelajar ke bekualiti ngagai bala nembiak.

“Pekara pelajar ke patut dikemerat lalu beguna amat dalam pengidup kitai. Nya kebuah kitai patut fokus nyeridi enggau ngajar bala anak mit ngambika dudi hari sida ulih nyadi orang ke menyana enggau ulih endur apai indai sida bepanggai enti udah bisi kereja,” ku Fatimah.

Penemuai basa tu mega ditampung enggau pengawa berandau pasal Aum Kerejasama Nasional (NCM 22) 2020 ke deka diatur berengkah ari 27 ngagai 29 November tu ba Bintulu.

Nambahka nya, NCM 22 tu benung diatur lalu deka tembu sehari tu di Bintulu lalu berandauka mayuh pekara kelebih agi pasal pelajar enggau pemansang anak mit di Sarawak.

Ku Presiden enggau Exco PPBM Anisa Ahmad, Pelajar tumu anak mit di Sarawak nerima timbal positif ari bala apai indai ke beratka pelajar anak sida ari mit enti dibanding ba Semenanjung Malaysia.

Ku iya, perambu enggau jalai ke diberi nengah bekunsika penemu tu ulih mantu gerempung di Semenanjung ngambi ngemansangka agi pelajar tumu anak mit ba selampur nengeri di Semenanjung Malaysia.

Ngelansa pekara bukai, Fatimah mega meri penemu pasal penanggul milih empat sujek teras kelebih agi ungkup nembiak Pom Empat bepun taun baru.

Iya madah, pekara nya meseti dipansik lalu diperunding baru laban tu bisi pemar kediri empu kelebih agi ari sukut suntuk pengajar ngambi ngajar subjek nya.

“Enti sema perambu nya deka ditampung mega meseti diperambu manah ngambi nyeliah empas negative dalam sistem pelajar ba sekula,” ku iya nerang silik.

Sama datai Presiden Pengajar Pelajar Tumu Anak Mit Bintulu (PAKB) Mariani Jaafar enggau Presiden Gerempung Sanding Penemu Pelajar Tumu Anak Mit Bintulu (AECE).