Perundingka baru nginsil BIPK

KUCHING: Menteri Kaunsil Kandang Menua enggau Pengawa Berumah Datuk Seri Prof Sim Kui Hian beratika pengawa Nginsil Bayar Insentif Perkhidmatan Kritikal (BIPK) dipejalaika Opis Orang Gawa Perintah (JPA).

Kui Hian ngarapka Perintah Besai ulih berunding baru pasal pekara tu begulai enggau Serakup Perubat Malaysia (MMA) enggau berundingka pekara diguna staf perubat di menua tu.

Kui Hian mega mantaika penemu ari iya empu ngagai Menteri Pengerai Datuk Seri Dr Dzulkefly Ahmad ke alai iya setuju berandauka pekara nya sekali agi ba renggat Kabinet Perintah Besai.

Nambahka nya, iya irauka pengawa berumban baka nya deka ngeruga servis perubat ke udah diperambu betaun enggau pekara nya deka meri pangka besai ngagai pesakit.

“Mayuh lutur enggau raban MMA udah madahka sida tekenyit enggau enda lantang ati pasal nginsil elaun nya,” ku iya meri penerang media, ditu tadi.