KUCHING: Raban Gerempung Akademi Dayak Iban Sarawak (Asadia) sekali agi ngatur Kelas Ngaga Periuk Tanah Renggat Ke-2 ngambika pesaka asal bansa Iban nya meruan idup sereta bisi dikeingatka nembiak rebak baru.
Ketuai Asadia Mabong Unggak dalam penerang media sehari tu madahka pengelandik ngaga periuk tanah ngembuan reti besai ba kenang cherita pengidup bansa Iban kelia.
“Nitih ke pansik ba Journal Muzium Sarawak taun 1962, periuk tanah ti dikembuan bansa Iban kelia sebaka enggau periuk tanah lama ke beumur 40,000 taun ti kala ditemu ba Gua Niah.
“Nya alai periuk tanah beguna ngagai bansa Iban lalu patut ditan nyadi pesaka asal,” ku iya.
Tandu Mabong, taja diatu kitai udah ngena periuk karan lebuh nyumai, tang periuk tanah agi mengkang nyadi ke tanda bansa ti diau di utara Pulau Kalimantan 40,000 taun menya.
“Aku ngarapka bala bukai sama bela tau ngetan pengelandik ngaga periuk tanah tu.
“Enti ulih genap iti ruang bilik kitai patut bisi ngembuan periuk tanah laban nya endang siti ari pesaka asal bansa kitai,” ku iya.
Mabong madahka sida beterima kasih ngagai Kaunsil Kraf Sarawak ti betuaika Tandang Matu ti udah kiruh sereta mentas nulung raban Asadia ngatur kelas nya.
Iya mega meri terima kasih ngagai Nabilah Abdullah ti nyadi pengajar ngajar chara ngaga periuk tanah.
