KUCHING: Sepital Normah nyadi palan berubat keterubah nerima kereban teknologi dikumbai ‘Cyberdyne Hybrid Assistive Limbs (HAL)’ ari Opis Gerempung Pengelikun Rama (Perkeso).
Exsekutif Director Palan Rehabilitasyen Perkeso Datuk Dr. Hafez Hussain madah, kereban nya dikena mantu pengereja pengawa ti bisi penanggul neurologi.
Ku iya, kereban ti muntang agi dikumbai Terapi Robotik nya asil ari kerejasama Perkeso enggau Sepital Normah numbuhka Palan Servis Rehabilitasyen ba Normah.
“Bisi dua unit ‘HAL Lower Limbs’, dua unit ‘HAL Single Joints’ enggau seunit ‘Lumbar’ disediaka kami ba Sepital Normah ungkup pemaik pesakit ditepan penyakit neurologi, mati tubuh sepiak (strok) enggau sekeda penyakit raya ti bekaul enggau neurologi.
“Tu endang sebagi ari juluk ati perintah ti deka ngemanah tikas pengidup rayat, ke alai semua kaban Perkeso ulih berubat ba palan rehabilitasyen tu,” ku iya.
Hafez bejaku munyi nya rambau Ngelancharka ‘HAL For Robotic Therapy In East Malaysia’ ba Sepital Normah ditu pagi tadi.
Iya andal, semua pengereja pengawa ti udah berubat ba palan rehabilitasyen nya ulih gerai lalu ulih gawa baru lalu nyaup ngemansangka komuniti.
