Pesakit positif di Miri baru pulai ari Tunisia

MIRI: Bagi Menua Miri agi dikategori Zon Gadung taja bisi siku pesakit Covid-19 baru diperubat ba Sepital Miri diatu.

Menteri Perengka Pengangkut, Datuk Lee Kim Shin madah, kes nya ditemu ba Padang Bilun Entarabansa Kuala Lumpur (KLIA).

Ku iya, peranak menua kitai nya pulai ari menua luar, Tunisia, nengah KLIA kena 20 June lalu datai ba Padang Bilun Miri kena 21 June tu tadi.

“Kes tu enda disengkaum dalam ripot statistik kes Miri enggau Sarawak laban iya ditemu ba pintu penama KLIA tauka Selangor.

“Pesakit tu nadai nunjukka sebarang kelai lebuh datai tang pemutus peresa PCR madahka iya positif Covid-19. Iya mega udah dipasuk berubat ba Sepital Miri,” terang iya.

Kim Shin ke mega menggi tanggungpengawa ba Komiti Penyangga Penusah Ngenyit Bagi Menua Miri madah munyi nya rambau aum pemberita ba Opis Residen Bagi Menua Miri, tadi.

Nambahka nya, orang sebilik enggau sida ke sama penerebai enggau pesakit mega udah dikelala Opis Pengerai Miri lalu dipinta kuarantin di rumah.