Pesakit Sepital Sentosa majak nambah

KUCHING: Bisi 16,216 iku orang ti bisi penanggul runding dirikod Sepital Sentosa naka taun 2019.

Direktor sepital nya, Dr Rosliwati Md Yusoff madah, penyampau nya nyengkaum sida ke dipasuk ngagai sepital sereta sida ti berubat pulai hari.

“Enti nitihka penyampau sida ke bisi penanggul runding ti diperubat ba ditu sigi nambah ninting taun.

“Penyampau nya tadi semina ba Sepital Sentosa, bedau ngaum sida ke nerima servis ari sepital bukai baka di Miri, Sibu, Bintulu, Limbang, Serian, Sri Aman, Kapit enggau ke baru di Sarikei,” ku iya.

Nangkan nya ku iya, mayuh macham kebuah ditemu ari sida ke bisi penanggul runding tu lalu ti pemadu terang iya nya ketegal ari gaya pengidup baka stres ba endur gawa tauka bala nembiak ti dikeduan ba sekula sereta tanggungpengawa ti mayuh.

“Ukai nya aja, bala pengajar mega mayuh ditemu bisi penanggul runding laban sida ukai semina stres lebuh ngajar nembiak tang ketegal sistem ngatur nengah online ba pengawa sida,” ku iya seraya madah, mayuh macham program udah dipejalaika Hospital Sentosa ngagai bala pengajar enggau nembiak sekula berindik ari pekara nya.

Kelimpah ari nya, iya nerangka stres ulih mai ngagai penanggul runding enti enda dipansik tumu.

Dr Rosliwati madah munyi nya ba aum pemberita pasal Aum Besai Pengerai Runding Sarawak 2020 Ke-6 enggau rambai jaku Embracing Mental Health Inclusivity: Towards Wellnes and Recovering di Hospital Sentosa ditu tadi.

Suara Sarawak