Petronas ngemaruhka Sarawak

“Enti sida (Petronas) nitihka atur enggau undang-undang menua luar, nadai kebuah enda ulih nitihka atur nya lebuh sida bejalaika operasyen di Sarawak.” – Awang Tengah.

KUCHING: Ulah Petronas enda mayar chukai jual lima peratus ari asil petroleum balat ngemaruhka menua kitai.

Ku Sapit Kepala Menteri Datuk Amar Awang Tengah Ali Hasan, Perintah Sarawak udah terang madahka Petronas patut nitihka atur enggau undang-undang di Sarawak.

“Sida enda tau enda mayar chukai lima peratus nya. Kebuah pia laban enti kompeni minyak ari menua luar baka Shell ulih mayar chukai nya ngagai kitai, nadai kebuah Petronas enda ulih.

“Enti sida (Petronas) nitihka atur enggau undang-undang menua luar, nadai kebuah enda ulih nitihka atur nya lebuh sida bejalaika operasyen di Sarawak” ku iya.

Awang Tengah madah munyi nya lebuh dirandau raban pemberita pengudah bejadika pengerami The Journey of 100 years diatur Opis Kampung Sarawak di sebuah hotel tebilang ditu tadi.

Iya nyemetak madahka ulah Petronas nya udah balat ngemaruhka menua kitai laban sengaja ngelanggar undang-undang ti udah ditetap.