LUBOK ANTU: Batalion 10 Pasukan Gerakan Am (PGA) Sarawak gawa 24 jam ngambika lima palan jaga ti dipelaba jalai chit di Lubok Antu nadai dipasuk raban orang luar tama nadai pemendar (Pati).
Operasyen ba lima palan nya dikumbai Ops Benteng Covid-19 dipejalaika bepun maya Atur Tagang Pejalai (PKP) nyentukka Atur Tagang Pejalai Penyuman (PKPP).
Asil perati Suara Sarawak meda sekeda raban penyaga enggau ketuai operasyen benung gawa ba sebuah palan kawalan garis entara menua Malaysia-Indonesia nya.
Ketuai Operasyen Insp Kenneystra Pius madahka, raban sida endang besedia belama matau garis entara berengkat ba palan besemak.
Ku iya, naka kemari nadai Pati kena tangkap ketegal tama nadai pemendar.
Ku iya, nyema bisi ditangkap, orang salah nya deka diburu pulai ngagai menua seberai (Indonesia) nengah jalai sida ditemu tama.
“PGA enda kala ngetu nyaga sekeda palan angat ti dipelaba nyadi jalai chit kenyau PKP dipejalaika.
“Kami endang deka terus gawa nitihka operasyen. Kami amat ngemeratka jaga garis entara Malaysia-Kalimantan, Indonesia.
“Atur Pengawa Standard (SOP) mega bisi dikemeratka maya gawa lalu kami bejalaika pengawa nitih atur ti dipadahka PDRM,” ku iya lebuh ditanya, kemari.
Berebak enggau nya iya minta peranak menua meri kerejasama madahka penerang bekaul pengawa salah kelebih ari aktiviti Pati tama nengah jalai chit.
Kelimpah ari nya, tinjau pemberita di Kompleks Imigresen, Kastam, Kuarantin enggau Keselamatan (ICQS) Lubok Antu meda nadai bisi aktiviti rentas garis entara menua digaga.
Entara kampung pemadu dampih ba Indonesia ti berimbai enggau garis entara menua iya nya pasar mit Putussibau kira-kira tiga kilometer ari garis entara.
