PH patut numbuhka komiti khas baru

MIRI: Perintah Pakatan Harapan (PH) patut numbuhka komiti khas (JK) ke baru dikena mutar isu peranak menua di Sarawak nyema Komiti Khas Peranak Menua Sarawak dikinsil, ku Kaban Parlimen Sibuti Lukanisman Awang Sauni.

Kenu ku iya, kebuah pia laban agi mayuh peranak Sarawak lebih agi sida ke biak bedau bulih status peranak menua.

Iya madah munyi nya lebuh dirandau media pengudah Ngelanjarja Pengerami Tanjong ba Kolej Tun Datu Tuanku Haji Bujang ditu kemari.

“Nyema Komiti Khas Peranak Menua Khas Sarawak ke sebedau tu enda ulih diguna ketegal ditumbuh dibaruh iring perintah ke udah, nyadi sida (PH) patut bumbuhka komiti khas ke baru dalam muytarka isu peranak menua di Sarawak,” ku Lukanisman.

Kenu ku iya, sigi enda patut bala sida ke nembiak enda ulih nyambung pelajar ketegal isu nya.

Lukanisman Awang Sauni

Kelimpah nya, Lukanisman nangkan JK Sarawak sebedau tu mandangka pemujur mantu rayat ke bisi bepenanggul bulih status peranak menua.

Sebedau tu, komiti nya udah baum urung 23 kali lalu nerima 723 peminta ari nya 127 mujur dikemendar.

Nengah komiti nya, pengawa mantis enggau meresa peminta ulih digaga sebedau peminta nya dianjung ngagai Opis Menteri Dalam Menua (KDN) lalu ngaga mosyen ke sebaka sekalika disukung tauka enda.

Apin lama ke udah, Opis Menteri Pengintu Pendiau, Pengelantang Komuniti, Orang Indu enggau Pemansang Anak Mit Datuk Sri Fatimah Abdullah madah iya bisi nerima surat kena 22 Julai 2019 ari KDN madahka opis menteri enda neruska JK ke udah ditumbuh kena Oktober 2016 nitihka undang-undang Perkara 15(A) Konstitusyen Perintah Besai.

Fatimah ti asa enggau pemutus nya diatu minta penerang ari Menteri Dalam Menua Tan Sri Muhyiddin Yassin bekaul enggau pemutus enda neruska pengawa komiti nya.

Suara Sarawak