PIBG menggi tanggung pengawa besai di sekula

SARATOK: Serakup Apai Indai enggau Pengajar (PIBG) nyadi raban menggi pangku pengawa besai nempa pelajar bekualiti di sekula.

Sapit Menteri Pengeluar Kuasa enggau Pengeraja Asal, Ali Biju madahka nengah PIBG, mayuh program enggau pengawa ulih diatur sereta dikemujur.

Ku iya, raban serakup nya mega ulih nyaup raban sekula mutarka bemacham penanggul ti ulih nekul pengawa ngajar enggau belajar (PdP) di sekula.

“Ambika chunto, PIBG ulih nyadi orang tengah entara pengajar enggau apai indai laban mayuh saru penemu nyadi entara sida nya lebuh bala nembiak bisi ngereja penyalah.

“Tebal agi apai indai pechayaka jaku tempa bala anak enti dibanding pengamat utai ke nyadi ngujungka sida saru penemu lalu besalahka bala pengajar.

“Ari inisiatif PIBG kitai ulih mutarka penyarut ke nyadi nengah randau ngambi semua pekara ulih dikerandau lalu pemaik pulai ngagai pemansang pelajar ke bekualiti, PdP deka lanchar,” ku iya.

Jaku Ali nya dikenataika pengari iya, pengajar Walter Changgai rambau pengawa nyuaka chek Projek Mit Pemansang Menua Pesisir (MRP) penyampau RM20,000 ngagai PIBG Sekula Sekondari (SMK) Saratok ditu, apin lama ke udah.

Chairman PIBG SMK Saratok, Chendang Pana ngarika serakup nya nerima chek ari pengajar Walter seraya dikemataka Prinsipal SMK Saratok, Philip Singkek.

Iya ke mega Kaban Parlimen Saratok madah, PIBG nyadi sebuah gempung ti bepenau numbuhka wang turu pelajar ungkup bala nembiak.

Kelimpah ari nya ku Ali, sekumbang kemisi sekula tu bala PIBG tau ngatur pejalai nyempulang bala pengajar ngabas bala nembiak ke rumah panjai tauka genturung pendiau bukai.

Ari pejalai tu ku Ali, sida ulih ngelala enggau nemu bagi nembiak ti napi pemar baka nadai akses internet, kereban belajar di ruai ke chukup enggau ke bukai.

Berita penuh Ruai 4 pagila

Suara Sarawak