PIBG SK Ng Tebat nerima tulung belanja ari Jugah

LUBOK ANTU : Kaban Parlimen Lubok Antu,Jugah Muyang udah meri bantu ngagai Gerempung Apai Indai enggau Pengajar (PIBG) Sekula Primari (SK) Nanga Tebat ditu ti dituntung penusah ketegal bah tunggal apin lama ke udah.

Tulung belanja sepenyampau RM25,000 nya diberi nengah PIBG sekula nya dikena ngatur program bekaul enggau nyeleti begunan sekula ti rusak kena duju bah.

“Genap ujung minggu aku endang selalu sereta bisi ngatur pejalai ngabas lalu berandau enggau rayat. Kebuah pia, laban tuju sereta juluk kenyau ari suba endang deka mai pemansang ba sitak diarika aku di Lubok Antu ditu.

“Nya alai,aku mesti magi jam enggau awak diri ngambi ulih berandau betungga lalu nemu penusah sereta penanggul ditapi rayat.

“Lebuh penusah bah tunggal nuntung SK Nanga Tebat lapan buah entukar pengajar dia diripotka bisi rusak,”ku iya ti digelar ‘Apai Pemansang’ ba peranak Lubok Antu nengah sebengkah penerang.

Sebedau nya, Jugah ke mega Chairman Kaunsil Industri Kayu Malaysia (MITB) bisi mendingka Taklimat pasal Penemuai Kepala Menteri Datuk Patinggi Abang Johari Tun Openg ke Lubok Antu dipelabaka kena 30 March tu.

Nangkan ke nya, Jugah bisi limpang ngabas pengawa beripai meresi kandang rumah sereta nyuaka agih belanja sepenyampau RM5,000 ngagai Komiti Pemansang enggau Pengelikun Genturung Pendiau (JKKK) rumah panjai Nanga Blaie dikena sida nukar paip ai ti udah pechah kena duju ai bah.

Suara Sarawak