Pilih mih parti ti ngemeratka hak Sarawak

SEBUYAU: Gempung Parti Sarawak (GPS) nya mih parti ke manah disukung laban seruran betatika peminta rayat, pia ku Kaban Parlimen Datuk Seri Rohani Abdul Karim.
Ku iya, GPS seruran ngamatka semaya ngemeratka hak Sarawak, sama baka visyen Ngemeratka Sarawak tauka dikumbai Ngemeratka Sarawak lebuh perintah mantaika penyiru nengah bemacham pelin pemansang.
“Nadai kebuah rayat enda nyukung GPS kelebih agi maya pengawa bepilih ke deka datai enti beratika projek ti udah dipejalaika Perintah Sarawak naka tu.
“GPS diembing Kepala Menteri Datuk Patinggi Abang Johari Tun Openg nya parti pemadu manah dipilih kita,” ku iya nyemetak madah.
Rohani ti mega Penyanding Penemu ba Opis Kepala Menteri mansutka jaku nya lebuh Pengawa Nyuaka Geran Agih Belanja Renggat Kedua Projek Mit Pemansang Menua Pesisir (MRP) enggau Projek Mesra Rakyat (PMR) ungkup taun 2020 ba Dun Sebuyau di Dewan Pembangunan Sebuyau, ditu kemari.
Geran penyampau RM419,000 di baruh agih belanja khas Menteri Besai Tan Sri Muhyiddin Yassin enggau Kepala Menteri udah disua ngagai 24 gerempung.
Ba lansa bukai, iya berasai sinu ngenang penusah ba Feri Triso lalu ngarapka sida niang sebilik sabar nempuh penguji besai nya.
“Pengudah trajedi tu, kitai meda Atur Pengawa Standard (SOP0 baru udah diterit ba semua pengkala feri nyengkaum ngasuh semua penumpang pansut ari entukar enggau bedarat tama ngagai feri.
“Semua SOP tu diterit laban enggaika penusah tu betandu. Nya kebuah, semua kitai mesti nitihka atur taja kitai suah ninga mensia mayuh muchau madahka SOP tu ngasuh entukar bebaris panjai nganti gintir tama ngagai feri.
“Pengawa neritka SOP nya ungkup pengelikun semua lalu ukai ketegal deka ngenusahka kitai. Kitai mesti belajar ari penusah ke kala nyadi,” ku Rohani.
Berebak enggau nya, iya ngelalau mensia mayuh seruran nyaga pengerai diri maya pandemik tu sereta seruran nitihka SOP ngambi besaup nagang pengerekai Covid-19.

Suara Sarawak