BINTANGOR: Semua rayat Sarawak patut nulak politik kamah enggau keji laban ulah baka nya tau amat ngemai pengerusak sereta ngeruga penyerakup di menua tu.

Menteri Muda Ba Opis Kepala Menteri (Pekara Korporat), Abdullah Saidol madah, atur pejalai pengawa politik enda ulih diseliah ba sebarang sejarah penempa mensia sereta penumbuh sebengkah menua lalu politik mega bisi ba tipan jerita pengerembai bemacham pengarap di dunya.

Ku iya, politik majak dibalut ulah ti enda menuku, makai suap enggau kelalu tinggi jaku ketegal ulah sekeda raban ti amu, semina dekaka nama, pangkat, ngira penguntung diri empu sereta senuah ti ngasuh rayat majak begedi.

“Tibak penemu aku tu nyangka dipeda kelalu andal utai ditusui tang aku pechaya agi bisi sekeda orang lurus ati ngaul diri ba politik, semina deka gawaka rayat enggau negika hak pulaika pemaik begulai.

“Taja pia, politik majak kamah enggau keji pengudah sekeda raban alah penemu lalu malut diri enggau ulah enda menuku baka bejaika pengarap, ngemaruhka adat enggau ngasut raban bansa,” ku iya rambau atur pengerami ngintu Gawai Rayat Dun Semop 2019 di Rumah Peter Mudai ditu, ensanus.

Ku iya, udah datai ba maya bala ketuai semua parti politik di menua tu ngatur randau ti bebatang enggau lurus dikena nyekat gaya politik ti majak bebalut.

Pengawa tu ku iya beguna amat dikena nentuka rebak dudi deka nampung pendiau ba menua ti likun enggau lantang.

“Kitai enda ulih besalahka rayat ti seruran meragam ngumbai bala ketuai politik ngembuan ulah enda lurus, tang tanggungpengawa nentuka atur pejalai politik dipebasa rayat bepanggai ba orang politik nya empu.

“Gaya dunya majak sigau kemaya hari, dikena ngubah peragam enda manah rayat pasal politik ukai pengawa ti muntang dikereja. Taja pia, kita tau milih, sekalika dekaka sebuah ruang bilik ti lantang enggau meruan tauka rumah ti besai enggau tegap?.

“Pekara tu majak tampak pengudah salah guna ba media ramah. Endang bisi sekeda orang bisi untak tang enda nemu berunding. Bisi mega mulut lanchat agi mansutka jaru ari akal,” ku iya.

Ku Abdullah, rayat Sarawak nadai pilih bukai kelimpah ari begempung enggau nulak agenda politik ti ngasuh pambar dikena nentuka menua tu seruran mansang dalam rampa likun enggau lantang.

Rayat mega patut milih ketuai ti lurus gawa enggau ngayanka pengeran sereta pengeransing ngemai pemansang pulaika pemaik begulai, tandu iya.

“Hari besai baka Gawai enggau Hari Raya ti dirami kitai taun tu nyangka ukai pekara ti sengaja nyadi tang tu berekat enggau kelai Tuhan ngajar kitai rayat Sarawak ngetanka penyerakup enggau nanggam teguh kaul pupu bansa enggau pengarap ti dikemeran ditu,” ku iya nerang silik.

Sarawak tu ku iya, menua ti diuwan pupu bansa di Malaysia sereta ngembuan penyelai enggau pengelain ari sukut gaya idup enggau pengarap.

Nya kebuah ku iya, semua tu enda patut dibalut enggau pengawa ti tau ngamah laban pemansang deka mar dipejalai enti rayat enda beserakup tauka bekerejasama.

“Kita mesti belajar daripada kesilapan yang lepas dalam membuat keputusan. Usahlah bakar kelambu hanya kerana marahkan nyamuk,” ujarnya.

Program Berami Lantang Ngintu Gawai Raya diatur nyentuk 24 Jun ti mungkur 26 bengkah genturung pendiau enggau rumah panjai dipegai sitak N.42 Semop.

Kelimpah ari miring enggau ngiling bidai, atur pengerami bukai ti bisi dibantai baka pemerindang enggau chabut tikit benasit.

Berebak enggau nya Abdullah ti mega Kaban Kunsil Nengeri (Adun) Semop mega bisi nyuaka pemeri ngagai JKKK genap rumah panjai sereta angpau Gawai Raya ngagai bala nembiak.

Sama datai Kaban Parlimen Tanjung Manis Yusuf Abd Wahab.