LUNDU: Program Bejual Barang Murah Malaysia Sebilik (PJMKM) di menua pesisir dikearapka ulih meri pemaik ngagai peranak besemak nyengkaum Dun Opar.
Adun Opar Billy Sujang madahka, program nya udah mantu ngelempungka tating belanja peranak menua.
“Bisi 27 bansa barang ti dirintaika nyadi barang ti dijaga rega baka minyak makai, berau, tepung gandum, mi enggau ke bukai. Semua nya dijual enggau rega ti murah.
“Peranak di Dun Opar mega bepeluang ngasaika rega diskaun nyentuka 20 peratus lebih murah ari rega ba pasar besai,” ku iya dalam penerang ti dikeluarka Unit Komunikasyen Perintah Sarawak (Ukas) Hari Enam tu tadi.
Ku iya, PJMKM ti diatur Opis Menteri Dagang Dalam Menua enggau Pekara Penguna (KPDNHEP) Bagi Menua Kuching enggau Gudang Yak Guam nya mega mujur narit minat rayat ba Opar bebelika barang.
Nya alai, iya ngarapka program baka tu diteruska ngagai palan di menua pesisir awakka meri pemaik ngagai sida.
“Mensia mayuh diperansang ngerebut peluang ti disediaka tu lalu merambu meli barang ti diguna ba rumah awakka ulih ngelimatka belanja maya bisi rega barang murah,” ku iya.
Sama datai, Penghulu Jinep Jiheng, Penghulu Longer Mised, Tuai Raban Bansa Kampung Bokah Sylvester Dize Mised enggau bala bukai.
