PKKM Engkilili minta isu servis, elaun tuai rumah diputar lengkas

ENGKILILI: Gerempung Ketuai Raban Bansa enggau Tuai Rumah (PKKM) N.33 Engkilili enda lantang ati enggau isu ti nuntung sekeda bala tuai rumah ba menua nya.

Chairman gerempung Tuai Rumah Johnson Damu madah, isu tu iya nya bekaul enggau nyambung servis sereta nyiri tuai ke baru ti kelalu lama enda diputar tauka nadai diberi elaun agi.

“Ari pansik komiti kami, bisi enam iku tuai rumah mengkang nganti ba pengelama setaun tang empai nemu servis disambung tauka enda lalu 28 iku agi udah bisi 10 bulan nganti enggau dua iku nganti enam bulan.

“Kelimpah ari nya, iya ke deka tembu servis tang empai nerima nama-nama surat bekaul iya nya bisi 35 iku,” pia ku iya maya Aum Besai PKKM ke diatur ba sebuah hotel di Sri Aman, kena 5 Oktober tu tadi.

Aum tu digulu empat iku penghulu enggau 150 iku tuai rumah.

PUTAR ENGGAU LENGKAS: TR Johnson (empat kanan) maya betuaika Aum Besai PKKM kena 5 Oktober tu tadi.

Johnson madah, gerempung sida minta opis perintah nengeri bekaul mutarka penanggul nya enggau jalai ti betul tang ukai chara bepolitik.

“Kebuah pia laban tuju gerempung tu iya nya dikena ngibun tuai rumah awakka ulih ngatur rayat ngambika mansang, likun begulai enggau pangan diri lebih agi begulai enggau perintah.

“Taja kami nemu N.33 Engkilili nadai nerima geran ari perintah nengeri agi tang enti nunda hal politik dibai dalam politik lalu pekara pemansang rayat enggau menua tetap dipejalaika.

“Ari nya rayat enda saru penemu ni bagi perintah ke amat-amat ulih nulung rayat,” ku iya madah baru.

Iya madah, enti isu ke nuntung nya majak enda diputarka, mayuh penanggul enggau penyarut nyadi ba rayat ketegal tuai rumah sida nadai setipikit megai pengawa.

“Pia mega kelimpah sida ke bisi setipikit tang empai nerima elawin, bisi sekeda peminta deka nyadi tuai rumah ke baru mega patut diputarka laban rayat udah pechayaka sida.

“Pekara tu patut diperundingka perintah awakka tuai rumah ulih ngempung rayat iya enggau nadai pengirau lebuh ngatur pengawa ngemansangka menua diri empu,” pia ku iya madah.

Johnson madah, nengah pansik gerempung sida, ba pegai opis pelilih Betong nadai penanggul tauka isu nyambung servis tuai rumah nyadi laban sebedau timpuh tembu, semua pekara bekaul endang udah diaduka magang empat bulan tumu ari nya.

“Nya alai, kami deka nemu nama kebuah isu tu tau nyadi ba pelilih Lubok Antu, Engkilili?”, ku iya madah.

Berindik ari nya, iya sekali agi ngarapka opis-opis ti bekaul ba perintah nengeri berunding mutarka penanggul nuntung sida bepun ari ketuai raban bansa enggau tuai rumah nyadi pelasar ke pengering penyerakup rayat ari ke pambar pendiau.

Bekaul enggau aum ke diatur gerempung sida, Johnsan madahka gerempung sida berasai enda lantang ati ketegal pengari ari Opis Pelilih Lubok Antu/Engkilili enda ulih ngenataika diri tauka nganjung pengari sida maya aum sehari nya.