BETONG: Opis Pengintu Pengelantang Raban Bansa Betong (PKMB) nyengkaum Pelilih Saratok kandang 20 hari dalam bulan tu udah nganjung bantu 4,016 kutak tauka 48,192 butul ai ngagai empat bengkah genturung pendiau enggau empat buah sekula ditu.

Kenu ku Pemesai PKMB Uwieng Gimos, sida nangkup peminta kandang menua ti bedau disambung bekal ai beresi sepanjai musim kemarau.

“Naka 22 April, sepenyampau 4,016 kutak tauka 48,192 butul udah diagih ngagai 5,332 penguna.

“Tu mungkur genturung pendiau di Kampung Tuie, Medang enggau Rumah Embol Nanga Sungai Anak Kabong sereta Rumah Empaling Jelang di Spak.

“Nyengkaum Sekula Primari (SK) Tuie, Perpat, Saint Barnabas, Saint Peter enggau Saint Paul Nanga Buai Padeh,” ku iya lebuh dirandau Suara Sarawak, kemari.

Ku iya, atur pejalai pengawa nganjung bantu mega lanchar.

Iya muji kerejasama diberi peranak ba genturung pendiau enggau piak sekula rambau atur pengawa ngagihka bantu nya.

“Semua raban bela gerah tulang besaup enggau kami ngemujurka pengawa ngagihka bantu tu,” ku iya.