PKP ba menua ‘angat’ aja

KUCHING: Perintah Sarawak dipinta enda neritka Atur Mindah Betagang (PKP) dikena nagang pengerekai igi penyakit Covid19 taja pekara nya balat ngasuh kitai irau ati.

Tuai Komiti Hak Pendiau Rayat Malaysia (Suhakam), Datuk Dr. Madeline Berma madah, pekara ke patut dipejalai diatu iya nya semina neritka PKP tauka matau sekeda endur ti ngerikod mayuh kes tauka menua ‘angat’ aja.

“Ambika chunto, siti endur dalam pelilih ngerikod mayuh kes Covid-19, anang neritka atur bepekul semua endur dalam pelilih nya, tang PKP tauka bepekul ba menua ‘angat’ nya aja,” ku iya lebuh dirandau, ditu kemari.

Dr. Madeline madah, taja PKP ba semua endur nya inisiatif pemadu manah enggau ngasi dikena nagang pandemik Covid-19, tang pekara nya enda engkeman dipejalai laban tau ngeruga sektor ekonomi enggau pengidup rayat.

Nya alai, iya ti mega pemikir ekonomi madah, PKP tau dipejalai ba sitak tauka pelilih ti ngerikod mayuh kes Covid-19 lalu pekara tu deka meri awak ngagai komuniti ba pelilih bukai bejalaika pengawa enggau aktiviti ekonomi baka selama.

Suara Sarawak