PKP: Bisi peranak rumah panjai rembus nengah jalai babas

SIBU: Ketuai Polis Pelilih Sibu, ACP Stanley Jonathan Ringgit madahka bisi sekeda peranak rumah panjai ti ditagang mindah dibaruh Atur Mindah Betagang (PKP) ngerembuska diri nengah jalai babas.
Taja pia, iya madahka pekara nya bisi nyadi ba peranak ti ditagang mindah ke bukai tang iya enggai nyebut nama rumah panjai ti ngereja ulah baka nya.
“Kami enda ulih nagang ulah sida laban kurang staf tambah mega bungkur pemesai endur dijaga kami.
“Pekara tu endang amat nyadi laban staf kami semina matau pejalai masuk enggau tama ngagai rumah panjai nya,” ku iya nerang, ditu kemari.
Stanley madahka bisi ladang ba belakang rumah panjai nya lalu sida ulih bedarat nyentuk dua ngagai tiga jam ngambi datai ba jalai besai.
“Kami enda ulih nyidi enggau nagang pejalai sida deka ngerembuska diri baka nya,” ku iya ti asa meda ulah sida nya.
Nangkan nya, iya madahka naka kemari bisi 48 buah rumah panjai ba Pelilih Sibu udah disekat pemindah.
“Penyampau rumah panjai ti ditagang mindah ke bukai nya enda tentu laban bepanggai ngagai kes positif Covid-19 nitihka endur,” ku iya.
“Sesebuah rumah panjai diterit atur mindah betagang tauka badu ditagang mindah ke bukai nya nitihka sanding penemu ari Opis Menteri Pengerai Malaysia (KKM),” ku Stanley.

Suara Sarawak