PKP ngajar ngemeranka guna teknologi digital

Rayat Malaysia diatu manggai hari ke-31 udah diau kemisi ba rumah ketegal Atur Tagang Pejalai (PKP) dikena perintah mutuska pengerekai penyakit Covid-19.

Taja pia, bisi sekeda sektor, opis perintah tauka kompeni peribit agi meruan dibuka bejalaika pengawa baka selama laban nya entara servis ti beguna (essential services).

Beduduk ari PKP ke udah masuk renggat ketiga mega, kitai bela nemu pengawa raban penerit adat mega tentu iya lebih terit ngichaka atur tu lebih ngasi nagang pengerekai Covid-19 ba selampur menua.

Berebak enggau nya, diatu mih maya iya tebal agi kitai ti empai kala nguji tauka ngelala guna bemacham aplikasyen servis ba ujung jari bepelasarka teknologi digital.

Ambika banding diatu kedua tentu udah mupuk belajar ari pangan diri baka ni nguna servis e-hailing baka GrabCar, GrabFood, GrabEkspress, GrabMart, Maxim, FoodPanda, Helpy, enggau mayuh agi ke bukai dikena ngudar pemakai taukka ngemuntang pejalai ngagai sesebengkah endur ketegal PKP.

Kelimpah ari nya, PKP tu mega ngajar kitai chara nguna servis e-tunai iya nya atur bebayarka bill tauka pinjau ari bank. Ambika banding aplikasyen Sarawak Pay, Boost, Touch n GO enggau Grab nyendiaka bemacham servis ke ulih alai bebayarka bill sereta bebelika barang online ari sekeda supermakit tauka kedai besai nyengkaum meli kredit telefon binching.

Sekumbang PKP mega, sekeda ari bala kitai ti rindu macha surat kabar tentu tusah deka meli surat kabar ari kedai ketegal ti nadai dichelak mayuh. Taja pia, ketegal pemansang teknologi digital pekara nya nadai pulaika penanggul laban kitai agi ulih macha surat kabar nengah chara digital dikumbai e-paper. Ungkup surat kabar Suara Sarawak enggau New Sarawak Tribune mensia mayuh ulih macha dua bengkah surat kabar tu enggau pechuma pengudah download ari aplikasyen play store.

Enda lama agi beserimbai enggau bulan Ramadan tentu iya bala menyadi kitai ke bepengarap Islam deka bepuasa. Nyadi enti ngelama tu, sida bisi muka bazar Ramadan ba dedini endur tang udah tu ila ketegal PKP sida semina ulih nyual pemakai nengah e-bazar Ramadan tauka ngena konsep e-hailing.

Ungkup nembiak sekula mega, sida diatu diberi kemisi panjai laban nangika pangka penyakit tu ngerampit ari pengawa ti begelumu. Nya alai, sida semina ngaga kereja sekula tauka e-belajar nitihka pesan pengajar ti dikirum nengah aplikasyen WhatsApp, Telegram enggau ke bukai kelimpah belajar nguna aplikasyen Zoom.

Atur baka tu tentu nadai penanggul digaga bala pengajar lebih agi ungkup sekula ba kandang mengeri tang bepenanggul ungkup nembiak ba menua pesisir beduduk ari perengkaguna penyambung ke empai menyana.

Bisi ayan ba surat kabar sebedau tu, sekeda nembiak sekula di menua pesisir ba Sri Aman diripotka tepasa nurun belajar ngagai kebun sawit ketegal ti deka ngulihka arus internet. Pekara tu tentu ngenyinuka ati kitai meda pengeransing bala nembiak nitihka atur singkang pemansang dunya digital dikena belajar.

Pia mega, penanggul ti ditapi peranak menua pesisir di Pakan nitihka ripot berita ke ayan ba surat kabar enggau media rama. Sida dipeda berintai panjai ba sebengkah balai polis laban ti deka minta permit deka nurun ke pasar Sarikei ketegal ti deka ngambika belanja ari bank tauka ATM kelimpah ti status diri bulih bantu (BPN) ari perintah.

Kebendar semua tu ulih nyadi muntang diperesa ari internet nyema sida semina deka meresa status duit ti udah diterima ba bank. Tang laban ti enda kala dituntung penusah ke baka tu tentu kitai kurang ngemeratka atur ngena chara online sereta nyamai agi milih nguna chara ke udah teleba digaga baka ngelama tu.

Nyadi jemah, nyema arus penyambung udah menyana kitai ngarapka penanggul ke bansa tu ulih teputar. Nyangka mayuh bala anak ke udah pandai sekula arapka ulih ngajar mantu bala apai indai di menua chara nguna teknologi digital awakka sida enda ngasaika penusah ke ditapi baka ke udah.

Ungkup raban nembiak ti rinduka pengawa lumba nengah chara online, sekumbang PKP tu mega perintah nengeri bisi ngatur sebengkah pekit e-lumba dikumbai ‘Sarawak Youth Stay At Home Esports Challenge’ ke dipasuk urung 656 penyereta. Pekit e-lumba tu dibagi ngagai dua kategori iya nya bemain FIFA 20 enggau PIBG Mobile (kediri).

Tu mih gaya ubah pengidup ke majak berubah sereta nyata dipeda kitai ketegal penusah ngenyit ke nuntung dunya. Semua tu ngajar kitai ngambika enda ulih enda berubah nyingkang, belajar nambahka penemu diri ngemeranka guna teknologi baru nitih ubah pemansang tauka pekara ke nyadi ke maya hari.

Suara Sarawak