PUTRAJAYA: Semua kedai nyual barang guna nyengkaum palan bebelika barang enggau stesyen minyak semina dikemendar beoperasyen, berengkah ari pukul 8 pagi nyentuk 8 malam ba renggat kedua Atur Tagang Pejalai (PKP) bepun 1 April tu.
Menteri Kanan (Kluster Pengelikun) Datuk Seri Ismail Sabri Yaakob madah, kedai enggau restauran sereta servis nganjung pemakai meseti beoperasyen ba jam ti sama sekumbang renggat kedua nya.
“Piak Perintah meransang mensia mayuh meli barang nengah chara on-line lalu kitai ngelalau sida nyeliahka diri ari betemu mua enggau orang ke nganjung barang pemakai sida,” ku iya.
Ismail mansutka jaku nya ba aum pemberita pengudah aum Komiti Khas Menteri-menteri pasal PKP, ditu kemari.
Hari Tiga tu tadi, Menteri Besai Tan Sri Muhyiddin Yassin madahka PKP ti diterit 18 March enggau abis kemari, dilanjar ngagai 14 March tu.
Ngelansa silik, Ismail Sabri ti mega Menteri Nyaga Pengelikun nyemetak madah, taja pengawa nagang diterit tang pekara tu bebida enggau pekara ke nyadi ba Simpang Renggam, Johor enggau Hulu Langat, Selangor ti dipejalai Atur Tagang Pejalai Diterit (PKPD) ke alai peranak enda dikemendar pansut enggau orang luan enda dikemendar tama ngagai kandang menua nya.
Nambahka nya ku iya, pengawa tagang nya jauh bebida enggau perintah bekurung baka dikerembaika piak ke enda mereti.
“Ba renggat kedua tu, kitai pechayaka mayuh pekara bebida nyadi lalu aku deka madah, tagang ba renggat kedua tu agi ngemendarka pejalai, kedai agi beoperasyen baka selama tang engka jam gawa dikurang,” terang iya silik.
Kelimpah jam operasyen kedai, Ismail Sabri madah ba renggat kedua tu, operasyen entukar ulih bejalaika mega deka dikurang.
Tu nyengkaum operasyen servis mengkang ditatak berengkah ari pukul 6 pagi nyentuk 10 pagi enggau ari pukul 5 lemai ngagai 10 malam aja.
