PKP Renggat Kedua : Bekal pemakai di Mukah dijamin chukup

MUKAH: Opis Menteri Dagang Dalam Menua enggau Pekara Penguna (KPDNHEP) Pampang Mukah meri jamin, semua bekal barang ba 53 palan bejual (POS) ba bagi menua Mukah nya chukup magang sekumbang renggat kedua Atur Tagang Pejalai (PKP) nyentuk 14 April tu.

Ketuai Pampang KPDNHEP Mukah Salihin Den madah, bekal barang nya chukup ungkup bala penguna ti deka ngintu pengerami enda lama agi.

Terang Salihin, semua pemekal barang udah dipadah ngambi semampai nambahka bekal sida dikena nangkup peminta nyentuk tiga bulan ke deka datai.

“Semua POS dijamin semua barang diguna chukup magang baka minyak sumai, gula, tepung gandum enggau berau kelimpah tong gis (LPG), petrol sereta diesel.

“Entara POS ngaul pekara tu iya nya ba kandang menua Matu, Daro, Dalat, Igan enggau Tanjung Manis,” ku iya lebuh dirandau Suara Sarawak.

Salihin madah, POS tu sebagi ari projek nyemela rega barang di baruh Unit Rega Barang Malaysia, KPDNHEP.
“Ungkus ngangkut barang diguna POS deka dipelanja BHBN enggau rega barang deka sama enggau rega ba mengeri,” tandu iya.

Dulu ari nya, pengudah aum Komiti Penyangga Penusah Ngenyit Bagi Menua Mukah, Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit, Datuk Seri Fatimah Abdullah ngansak KPDNHEP nentuka semua 800 POS ba Sarawak enda suntuk barang diguna sekumbang PKP renggat kedua enggau pengerami tu ila.

Berebak enggau nya, Perintah Sarawak apin lama udah mantaika agih belanja tambah RM16.4 juta ungkup bantu ngagai raban diselinting ba menua tu ti napi penusah sekumbang PKP.

Suara Sarawak