PKPB di Kuching disambung nyentuk 27 November tu

KUCHING: Atur Mindah Betagang Belebas (PKPB) ba Pelilih Menua Kuching disambung lima hari bepun sehari tu (23 November) nyentuk 27 November tu.

Pemangku Chairman Komiti Penyangga Penusah Ngenyit Negeri (JPBN) Tan Sri Datuk Amar (Dr) James Jemut Masing madahka taja pia nyema PKPB ditemu enda ibuh dipejalai agi maya timpuh nya, sida deka mandakka timpuh lanjar tu.

“Pupu rata kes rampit enda semina numpu ngagai siti-siti palan aja, nya alai ngira risiko rampit PKPB di Pelilih Menua Kuching dilanjarka ngagai 27 November.

“Kelimpah ari nya, atur tama ke Sarawak enggau timpuh kuarantin sepengelama 14 hari mega dilanjarka ngagai siti hari bulan bukai tideka dipadahka ila,” ku iya.

Masing bejaku munyi nya ngagai bala pemberita di Dun Lama ditu, kemari.

Ku iya, pejalai keluar enggau tama ke Kuching tauka neresa Pelilih Menua Kuching naka kediatu bedau dikemandarka agi nyema nadai tuju rasmi tauka tuju bekereja.

“Surat pemendar enggau pas gawa ari Ketuai Opis tauka pengaji mesti bisi, tang bagi kes penusah ngenyit mensia mayuh mesti ngulihka surat pemendar ari Polis Diraja Malaysia (PDRM).

“Taska enggau tadika di zon mirah enggau zon kuning udah tau dikemendarka beroperasyen, tang sida mesti nitihka Atur Pengawa Standard (SOP) ti ditetepka Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Sarawak (KKWKPK),” ku iya.

Iya nandu, penyampau tubuh ti dikemendarka dalam sebuah kerita maya PKPB tu agi mengkang tiga iku.
Dulu ari nya, iya madahka nadai kes positif Covid-19 baru dirikodka ba Sarawak ti ngujungka penyampau kes positif di menua tu mengkang 1,055 kes.

Ku iya, bisi lima kes baru udah suman sereta dikemandarka pansut ari sepital dirikodka kemari ti ngujungka penyampau kes udah suman sereta dikemandarka pansut ari sepital bisi 977 iku.

“Tiga kes suman ari Sepital Besai Sarawak enggau dua kes ari Sepital Miri.

“Pia mega bisi 38 iku Pesakit Agi Dipatau (PUI) dirikodka kemari ke alai dua PUI agi nganti peresa makmal,” ku iya.

Suara Sarawak