PKPB di Sarawak dilanjar baru, 173 kes baru positif

KUCHING: Atur Mindah Betagang Belebas (PKPB) di Sarawak dilanjarka berengkah 16 Mac pukul 12.01 pagi nyentukka 29 Mac pukul 11.59 malam tu ila.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka PKPB tu dilanjarkan laban kes positif Covid-19 di menua tu agi tinggi.

“JPBN dalam aum ngambi pemutus ngelanjarka PKPB di Sarawak berengkah 16 Mac pukul 12.01 pagi nyentukka 29 Mac pukul 11.59 malam pengudah beratika kes positif Covid-19 di menua tu agi tinggi.

“Taja pia, Atur Mindah Betagang Diteritka (PKPD) di Kampung Skim Pengentap Pendiau Baru Sentosa Fasa 2, Sibu udah diketuka laban nadai kes positif Covid-19 ditemu ba peresa ti kedua kelimpah nadai kelai bisi kes berampit ba palan nya,” ku iya.

Uggah madah munyi nya ba Aum Media Covid-19 di Dun Lama ditu, tadi.

Dulu ari nya, iya madahka Sarawak ngerikodka 173 kes positif baru Covid-19 kemari di Pelilih Menua Sibu (71), Miri (19), Bintulu (16), Kuching (15), Meradong (10), Serian (9), Julau (7), Kapit (5), Tanjung Manis (5), Betong (3), Belaga (2), Mukah (2), Sri Aman (2), Subis (2), Telang Usan (2), Dalat (1), Samarahan (1) enggau Sarikei (1).

Ku iya, nya ngujungka penyampau kes positif Covid-19 di menua tu nambah 12,051 kes.

Iya madahka, ari 173 kes positif baru Covid-19 tu, 19 iku orang ti positif nya bisi nunjukka kelai.

Suara Sarawak