PKPB di Sarawak dilanjar nyentuk 15 March 2021

KUCHING: Komiti Penyangga Penusah Ngenyit Nengeri (JPBN) ngaga pemutus ngelanjarka Atur Mindah Betagang Belebas (PKPB) di Sarawak bepun 1 Mac ngagai 15 Mac tu ila.

Dalam penerang media sehari tu JPBN madahka, PKPB tu dilanjarka berindik ari gaya kes positif ti majak nambah ba menua tu.

Kelimpah ari nya, JPBN mega mutuska Atur Mindah Betagang Diterit (PKPD) dipejalaika ba Palan Pengentap Pendiau Baru Sentosa, Fasa 2, Sibu.

Ku penerang nya madah, pemutus tu diambi lebuh meratika kes positif ba sitak nya ngaul genturung Sentosa di Pelilih Menua Sibu.

Nya alai PKPD di Sentosa, Sibu deka berengkah 27 Februari ngagai 12 Mac tu ila.

Nangkan nya, sehari tu bisi 131 kes baru udah suman sereta dikemendarka pansut ari sepital.

Kes suman sereta dikemendarka pansut ari sepital tu dirikodka ba Sepital Sibu (93), Sepital Besai Sarawak (16), PKRC di baruh Sepital Kapit (9), Sepital Bintulu (7) enggau Sepital Miri (6).

Nya ngujungka penyampau kes suman sereta dikemendarka pansut ari sepital nambah 6,621 iku.

Suara Sarawak