PKPD di Enteban Ulu enggau Tanjong Skrang

ENGKILILI: Atur Mindah Betagang Diterit (PKPD) udah dipejalaika ba Rumah Mau, Enteban Ulu enggau Rumah Bansang, Tanjong Skrang ditu dikena nagang pengerekai penyakit Covid-19.
Nitihka berita Ukas sehari tu, beduduk ari nya Opis Pengerai Sri Aman enggau Opis Pengerai Betong udah netapka 99 iku peranak Rumah Mau enggau 120 peranak Rumah Bansang datai beperesa pengerai.
Ba penerang bekaul dipansutka laman media rama Sri Aman fm nesau mensia mayuh ke bisi ngulu penusah rabat ba Rumah Baing Kumpang Langir kena 29 Disember 2020 tauka bisi ngusung rumah panjai Tanjong Skrang kena 5 Jan nyentuk 16 Jan tu tadi dipinta datai beperesa pengerai enggau lengkas.
“Mensia mayuh ke bisi berasai kelai tabin, rengga tauka berasai sendat seput mega diperansang datai beperesa Covid-19 ba sepital tauka klinik pengerai ke besemak,” ku tandu penerang nya.
Berebak enggau nya, Raban Penerit Adat udah ngempang jalai tama ngagai dua rumah panjai tu dikena nagang orang bukai datai kia tauka peranak rumah panjai nya pansut ari rumah.
Kelimpah ari nya, Opis Pengintu Pendiau Raban Bansa (JKM) Sri Aman enggau JKM Betong bisi datai nganjung barang pemakai ngagai dua buah rumah panjai nya.