PKPD di Kampung Emperoh Jambu, Padawan

KUCHING: Komiti Penyangga Penusah Nengeri Sarawak (JPBN) Sarawak udah ngaga pemutus neritka Atur Mindah Betagang Diterit (PKPD) ba Kampung Emperoh Jambu di Padawan.

Chairman iya, Datuk Amar Douglas Uggah Embas madahka JPBN ngaga pemutus nya pengudah beratika kes positif ba kluster nya ngaul tiga pelilih iya nya Kuching, Samarahan enggau Serian.

Ku Uggah, PKPD deka diterit ba Kampung Emperoh Jambu berengkah pukul 12.01 pagi 23 Februari nyentuk 11.59 malam 8 March tu.

Pia mega, PKPD ba rumah flat enggau genturung Town Villa, Sibu Jaya dilanjar, berengkah ari 12.01 malam 26 Februari nyentuk 11.59 malam 4 March tu.

Uggah madahka Pelilih Meradong enggau Pelilih Song udah bebali ngagai status oren pengudah ngerikod 31 enggau 35 kes berampit dalam menua ba timpuh 14 hari ke udah.

“Sarawak tadi ngerikod siti kes pemati baru di Sibu ngujungka kes pemati nambah 74 iku tauka 0.91 peratus ari semua kes positif.

“Kes pemati ke-74 nya kes ke-5,707 ngaul siku lelaki peranak menua beumur 58 taun ti diperubat ba Sepital Sibu lalu iya bisi kelai renga, batuk enggau sendat seput.

“Iya mega ditemu positif Covid-19 kena 7 Februari tu tadi enggau bebadi nyawa kena 20 Februari tu tadi sereta bisi penyakit Mixed Connective Tissue Disease (MCTD) with pulmonary involvement.

“Bisi 221 kes baru positif Covid-19 di Sarawak ngujungka nambah 36 kes tauka 19.46 peratus ari kes dirikodka kena 21 Februari tu tadi.

“Kuching tadi ngerikod 67 kes ditangkan 63 kes ari Sibu, 28 kes ari Bintulu, 24 kes ari Meradong, 15 kes ari Kapit, 11 kes ari Samarahan enggau lima kes ari Miri.

“Pia mega, tiga kes ari Bau, dua kes ari Subis sereta bela siti kes ari Beluru, Betong enggau Kanowit,” terang Uggah.