PKR Baram patut nyukung pengawa GPS

Ngangkat Baram nyadi Bagi Menua

MIRI: Bisi sekeda atur pengawa ti patut dipejalai ngena chara betul dikena ngangkatka Baram nyadi sebuah bagi menua.

Ku Adun Telang Usan Dennis Ngau, sekeda bagi pekara patut diperati enggau ditangkup ngambika Pelilih Baram ulih diangkat nyadi bagi menua.

“Baram diatu benung diperatika perintah sekalika iya tetangkupka peminta ti patut.

“Perintah Sarawak udah mendingka perambu kami ti deka meda enggau ngangkatka Baram nyadi sebuah bagi menua,” ku iya lebuh dirandau Suara Sarawak.

Dennis nerangka pekara tu enda ibuh dibai ngagai Dun laban sida (GPS Baram) udah betemu sereta berandau enggau Kepala Menteri Datuk Patinggi Abang Johari Abang Openg.

Dennis Ngau

“Opis Residen Miri diatu udah digerah Kepala Menteri bejalaika pansik ungkup tuju pengawa nya.

“Nya alai, juluk Parti Keadilan Rakyat (PKR) Baram ti deka ngemai perambu tu ngagai Dun tau dikumbai udah kelalu jauh tinggal,” ku iya nampung.

Ku Dennis, sida ari Perintah Sarawak enggai kelalu tampak sereta begendangka pekara nya.

“Perambu baka tu kea mat enda ibuh dibai ngagai Dun.

“Baka Telang Usan enggau Beluru ti diangkat nyadi pelilih menua sebedau tu, kami nadai kala mantaika pekara tu ngagai Dun.

“Kami semina ngatur randau enggau Kepala Menteri baka ti digaga sebedau tu,” ku iya nerang silik.

Nya kebuah ku Dennis, iya minta PKR Baram nyukung GPS ba pekara nya lalu enda ibuh kerah-kerah mansutka penemu.

Dulu ari nya, Chairman PKR Baram Roland Engan mansutka penerang ti nyakap tiga Adun Baram GPS ngemai perambu ngagai Dun ngambi ngaku enggau ngangkatka Baram nyadi sebuah bagi menua.

Tiga Adun Baram ti disebut Roland nya iya nya Adun Mulu Datuk Gerawat Gala, Adun Marudi Datuk Dr Penguang Manggil enggau Adun Telang Usan Dennis Ngau.