KUCHING: Parti Keadilan Rakyat (PKR) Sarawak ngenuku diri deka bediri ba 49 ari 82 penuduk Kunsil Nengeri (DUN) ba Pengawa Bepilih Besai Nengeri ke-12 (PRN12) tu ila.
Lebuh nerangka pekara nya, Pemangku chairman PKR Sarawak, Abang Zulkifli Abang Engkeh madah entara sitak Dun ke diselinting ulih menang iya nya Dun Ba’Kelalan, Krian enggau Batu Lintang.
“Parti kitai (PKR) seruran andal enggau naka ulih ngetanka penuduk PKR ba pengawa bepilih besai ke udah iya nya ba Dun Ba’Kelalan, Krian enggau Batu Lintang.
“Ari perati kami enggau baka ni pengari rayat ari PKR ngaul rayat sereta timbal ke diterima kenyau lebih dua taun ke udah, kami andal lebih ari tiga penuduk Dun deka ulih menang ari chalun PKR,” ku iya madah ngagai pemberita, Hari Enam.
Ku terang Abang Zulkifli, gempung raban penyakal enggau sekeda parti bukai baka Parti Tindakan Demokratik (DAP) enggau parti AMANAH Sarawak mega udah berundingka agih sitak ke deka dilaban maya PRN12.
“Pengawa ngengkahka chalun ba sitak Dun nya mega udah dipansik enggau silik sereta berundingka pendiau chalun, sereta sukung ba Dun nya.
“Pendiau ke dikemerat ba chalun iya nya mesti orang ke gayuk engagu rayat, nemu kuing tuju parti, nulak makai suap enggau tan pedis ba sebarang aja pemar politik ke naydi ba menua tu,” ku iya.
Iya madah, PKR mega deka mantaika 20 peratus chalun baru mungkur chalun parti ari sida ke biak enggau datai pupu bansa.
“Chalun kitai ti deka bediri mega bepanggai ba majoriti bansa ba sesebengkah sitak tauka chalun nya bepelasarka penengkeman ba sitak Dun nya.
“Tu entara atur ke pemadu beguna enggau deka mantaika isu rayat ari menua pesisir,”ku iya.
Dulu ari nya, Kaunsil Tuai Nengeri (MPN) PKR Sarawak bisi ngatur aum khas pasal pekara pemadu baru bekaul PRN-12 Sarawak.
