KUCHING: ‘Skuad Khas Pasukan Gerakan Am’ tauka Platun Tiger endang sigi benung matau sereta nagang sebarang pengawa ti bekaul enggau nangkap jelu siga di menua tu.
Ketuai Polis Sarawak Datuk Ramli Din madahka ukai semina jelu siga, raban nya mega diberi tanggungpengawa nyaga utai tumbuh ti dilindung perintah.
“Sida endang matau sereta nyaga jelu siga enggau utai tumbuh ti dilindung perintah.
“Atur penerit adat deka diambi nyema bisi orang ngachau tauka nangkap jelu siga ti ngelanggar undang-undang perintah,” ku iya.
Ramli bejaku munyi nya lebuh ditanya pemberita maya pengawa penemuai basa ngagai Kepala Menteri Datuk Patinggi Abang Johari Tun Openg ba Wisma Bapa Malaysia ditu, lemai tadi.
