KUCHING: Seagi apin ditemu pemutus nyemetak, Perintah Perikatan Nasional (PN) agi tegap lalu aku agi nyadi Menteri Besai kita, pia ku Tan Sri Muhyiddin Yassin.
Ku Muhyiddin, iya nemu pasal penerang Kaban Parlimen Port Dickson, Datuk Seri Anwar Ibrahim ti madahka diri bulih sukung majoriti bala kaban parlimen bukai dikena numbuhka perintah baru.
“Penerang nya mesti dibantai nengah atur ti ditentuka Konstitusyen Perintah Besai.
“Enti nadai diadu ngena chara nya, penerang dibantaika Datuk Seri Anwar nya semina jaku ngapa,” terang iya.
Muhyiddin minta rayat anang irauka pekara ke nyadi diatu.
“Isu tu deka diputar enggau chara ke manah nitihka atur undang-undang enggau Konstitusyen Perintah Besai,” ku Muhyiddin.
Presiden Parti Keadilan Rakyat (PKR) Datuk Seri Anwar Ibrahim madahka diri bulih sukung tegut ari kaban parlimen ngambi dibantai ngagai Yang di-Pertuan Agong.
Ku Anwar ba sebengkah aum pemberita khas, iya diasuh mantaika kaban parlimen ti nyukung iya ngagai Agong kena Hari Dua tu tang ditangguh dulu laban Agong benung berubat ba Palan Tungkul Sengayuh Menua (IJN).
Taja pia, iya nadai madahka penyampau penuduk ti nyukung iya laban pekara nya deka dibantai ngagai Agong dulu.
