PN besemaya deka adil ngagai Sabah enggau Sarawak

SARATOK: Perintah Perikatan Nasional (PN) udah besemaya enda bepinang benibung ba hak Sarawak enggau Sabah.

Sapit Menteri Pengeluar Kuasa enggau Pengeraja Asal, Datuk Ali Biju madahka diri berasai lantang ninga semaya digaga Menteri Besai Tan Sri Muhyiddin Yassin ti ngemudika Perintah PN diatu.

Ku iya, menua Sarawak enggau Sabah jauh tinggal ba mayuh sukut lalu semaya nya meri pengandal ngagai menua kitai deka bulih pemansang sebela.

“Ba aku empu, tu ukai semaya bula laban kitai meda tuju portfolio Pekara Sabah enggau Sarawak ditumbuh dalam Kabinet Perintah PN endang dikena nyaga hak kededua menua tu.

“Ari nya, aku andal amat penyauh takah pemansang entara Sarawak enggau Sabah sereta Semenanjung udah tu ulih dikurang nitihka semaya nya,” terang iya.

Ali ti mega Kaban Parlimen Saratok mansutka penemu nya dikena nimbal jaku dipansutka Menteri Besai Tan Sri Muhyiddin Yassin beserimbai enggau genap setaun PN udah megai perintah sehari tu tadi.

Iya madah, perintah mega berundingka pekara pemansang ba kededua menua lalu deka bejalaika mayuh pengawa dikena ngerumban pemansang dia.

Suara Sarawak