KUCHING: Parti bakih Gempung Parti Sarawak (GPS) ari Semenanjung Malaysia (Pakatan Nasional) patut bebasaka GPS bekaul agih penuduk Dun ba Pengawa Bepilih Besai Nengeri (PRN-12) ti deka datai.
Mandal Presiden PBB ke mega penyandang Dun Asajaya Datuk Seri Abdul Karim Rahman Hamzah madahka GPS udah ngaga gerah deka bediri ba semua 82 kerusi Dun Sarawak.
“Aku ngasaika nadai agi kerusi dibagi ngagai parti bakih ari Semenanjung Malaysia taja pan sida bakih kami, sida patut bebasa meh.
“Tu laban, GPS bisi empat komponen parti (PBB, SUPP, PRS enggau PDP) ke alai kami udah magi ni kerusi ungkup nuan enggau ni bagi kerusi ungkup kami, sida (parti bakih) udah laun,” ku iya.
Iya bejaku munyi nya lebuh ditanya pemberita pengudah bejadika Sarawak Adventure Challenge (SAC) renggat kelima di Siniawan, Bau kemari.
Abdul Karim ngelansa pekara nya lebuh ditanya sentang penuduk penyandang Dun Krian Datuk Ali Biju ba PRN-12 ti deka datai.
Ku iya, Ali patut nitihka pemutus Kaban Parlimen Puncak Borneo Datuk Willie Mongin ti madahka iya enda deka bediri ba renggat Dun sekali tu.
“Aku ngasaika semua penyandang ti ukai ari GPS ke megai tanggungpengawa nyadi Kaban Parlimen tauka penyandang Dun patut ngaga pekara ti sebaka.
“Aku pechaya GPS deka ‘menang bergaya’ laban kitai bediri ukai deka alah, lalu kitai ngarapka raban pegundi di Sarawak ulih mulaika mandat nya ngagai GPS,” ku iya.
Ba PRN-11, Ali ti mega chalun Parti Keadilan Rakyat (PKR) maya nya mujur ngalahka chalun Barisan Nasional (BN) Kilat Beriak di Dun Krian enggau menang majoriti 1,640 undi.
Taja pia, kena 22 Ogos 2020 Ali nyereta Parti Pribumi Bersatu Malaysia (Bersatu) ke alai parti nya diatu endang parti bakih GPS.
