Polisi ‘Ngemeratka Sarawak’, semua rayat dijaga – Abang Johari

KUCHING: Kepala Menteri Datuk Patinggi Abang Johari Tun Openg deka nentuka polisi perintah bechuanka rambai jaku ‘Ngemeratka Sarawak’ lebuh negika hak enggau pengelantang semua raban bansa.

Ku iya, raban bansa di menua tu nadai dikelaung ari nerima buah pemansang sekalika ari sukut bantu, endang diberi magang baka ti udah dipejalai Perintah Sarawak ngelama tu.

“Nya kebuah, ari suba kitai ngemeratka polisi ‘Ngemeratka Sarawak’, ukai ngemeratka bansa laban kitai deka nyaga semua rayat.

“Orang Melanau, Bidayuh, Iban, Orang Ulu pan sebaka enggau kitai,” ku Abang Johari.

Abang Johari mansutka jaku nya lebuh Pengawa Nasih Tanah Wisma Melayu Sarawak, ditu kemari.

Datuk Patinggi Abang Johari Tun Openg

Sama datai Sapit Kepala Menteri ti mega Chairman Lembaga Pemegang Amanah, Amanah Khairat Yayasan Budaya Melayu Sarawak (AKYBMS) Datuk Amar Awang Tengah Ali Hasan enggau Menteri Muda Dagang enggau Pemansang Dagang Mit enggau Jelan Pemesai ti mega Chairman Komiti Besai Pengawa Nasih Tanah Wisma Melayu Sarawak, Datuk Mohd Naroden Majais.

Ku Abang Johari, inisiatif tu terang bendar ukai semina mantu orang Melayu tang mega udah nyendiaka bantu ngagai raban bansa Iban enggau Bidayuh nyengkaum Orang Ulu.

“Suba aku meri agih belanja ngagai Balai Dagang enggau Industri Dayak (DCCI), diatu aku meri agih belanja ngagai orang Melayu lalu bulan baru aku deka meri agih belanja ngagai Orang Ulu.

“Kitai nyaga pengelantang semua rayat laban kami orang Melayu nyebut kitai diri menyadi lalu sida (raban bansa bukai) mega ngembuan penemu ti sebaka.

“Tu mih chara kitai nyaga pengelantang semua,” terang Abang Johari.

Berebak enggau nya, iya nyamin tiap raban bansa deka ngasaika pengelantang ari penatai pemisi menua.

“Dua tiga hari tu pemujur dijapai kitai udah nambah nyengkaum berunding enggau Petronas.

“Pemujur tu mega ngenataika mayuh ubah kelebih agi nambahka penatai pemisi kitai.

“Nya kebuah, kitai deka ngagihka belanja ngagai rayat enti menua ngembuan mayuh penatai pemisi.

“Nya alai, kitai deka ngena enggau ngetanka undang-undang dikemisi kitai ngambi ngemansangka diri,” ku Abang Johari nerang.