KUCHING: Randau bekaul polisi pengerai deka diatur nengah siti aum begulai enggau Menteri Pengerai Malaysia dikena berandauka isu suntuk pengereja pengawa perubat di Sarawak.
Sapit Premier Sarawak, Datuk Amar Dr. Sim Kui Hian madahka iya deka ngiga haribulan ti engkeman endur ngatur aum nya ngambika penanggul nya ulih diputar enggau komprehensif.
“Penanggul suntuk lutur di Sarawak ukai semina fokus ngagai insentif belanja aja, tang mega ngaul polisi bekaul enggau peluang matih raban graduate, nganjung lutur gawa enggau ngambi raban perubat gawa.
“Peluang lutur di Sarawak ngulihka latih ari pakar patut diberi perati laban pekara tu beguna dalam pengawa deka nambahka penyampau lutur pakar di nengeri tu,” ku iya.
Dr. Sim bejaku munyi nya lebuh ditanya pemberita pengudah bejadika Festival Discovery Padawan 2026 ba Balai Mensia Mayuh Quarry Ang Cheng Ho ditu, kemari.
Ku iya, Sarawak patut diberi peluang ngambi lutur kediri nitihka pinta raban graduate pekara perubat ari institusyen perubat di Malaysia, dikena mantu mutarka penanggul suntuk pengereja pengawa perubat di nengeri tu.
Iya nambah baru, perambu ungkup Komiti Perubat Sarawak ti deka ngambi lutur perubat di Sarawak mega entara pekara ti tau diperundingka.
Nambahka nya ku Dr. Sim, randau enggau Menteri Pengerai nya mega deka mungkur isu belanja, Sempekat Malaysia 1963 (MA63) enggau pansik guna teknologi baka pemintar digaga (AI), nyadi chara mutarka penanggul tu dalam timpuh panjai.
Ku iya, chara tu ulih mantu mutarka pemar nyendiaka servis pengerai, kelebih agi ba kandang endur ti mar dilawa raban pengerai menua.
