Politik mesti tegap dikena nyapai juluk menua maju

KOTA SAMARAHAN: Menteri Besai Tan Sri Muhyiddin Yassin berasai temegah sereta beterima kasih ngagai Gempung Parti Sarawak (GPS) ti betuaika Kepala Menteri Datuk Patinggi Abang Johari Tun Openg laban nyukung terus iya megai Perintah Besai.

Ku iya, lebuh menua napi penanggul ti enda kala nyadi dalam sejarah Malaysia, iya begunaka sampi ari rayat di serata menua tu nyengkaum Sarawak.

“Menua kitai deka terus likun nyema rayat terus begempung.

“Kenyau aku dichiri nyadi Menteri Besai, maya nya menua endang udah berengkah napi pengerekai penyakit Covid-19 ti enda kala nyadi dalam sejarah menua,” ku iya.

Iya bejaku munyi nya rambau Program Betemu enggau Peranak Kota Samarahan ba Palan Pematih Pengajar Tun Abdul Razak (IPTAR) ditu, ensana.

Ku iya, pangku pengawa nyadi Menteri Besai diterima iya pengudah politik menua napi penanggul ketegal Menteri Besai sebedau tu nyurutka diri.

“Lebih dua minggu udah aku nyadi Menteri Besai, menua kitai maya nya benung bebendar ngelaban pengerekai Covid-19, nya alai aku berundingka chara dikena mutarka penanggul tu.

“Kelebih agi, penanggul tu sigi enda kala nyadi, nya ngujungka aku nadai palan endur minta sanding penemu sereta bepanggai.

“Berebak enggau nya, perintah mega bebendar ngerunding pasal nyawa rayat, nya ti ngasuh perintah meri bantu agih belanja ti chukup besai dikena nagang pengerekai Covid-19,” ku iya.

Ku iya, maya nya nyawa rayat endang reta pemadu beguna patut dijaga perintah kelimpah pekara ekonomi menua ti majak kusut.

“Enda kala nyadi dalam sejarah menua kitai ekonomi kusut 70 peratus, tang ketegal Covid-19 pekara nya nyadi nyata.

“Kedai mayuh tutup, rayat enda ulih gawa lalu pengidup rayat di serata menua berubah, tang diatu nyau deka 100 peratus sektor ekonomi menua berengkah dibuka,” ku iya.

Kelimpah ari nya, iya mega madahka Perintah Besai deka nyukung perambu Perintah Nengeri ti deka nyingkang nyadi nengeri pemadu maju 10 taun ti deka datai.

Ku iya, dikena nyapai juluk ati (nyadi menua maju) tu menua mesti ngembuan politik ti tegap.

Iya mega besemaya deka meri mayuh agi bekal vaksin ngagai Sarawak pengudah pulai ke Kuala Lumpur ila.

Dulu ari nya, Muhyiddin enggau bini iya ngambi awak betemu enggau peranak di Kampung Sindang Baru, Kota Samrahan seraya diuluka Abang Johari, Sapit Kepala Menteri Datuk Amar Awang Tengah Ali Hasan, Menteri Dagang Temuai, Seni, Main Asal Datuk Abdul Karim Rahman Hamzah enggau ke bukai.

Suara Sarawak