KUCHING: Opis Menteri Pengerai Malaysia (KKM) deka muka Palan Meri Vaksin (PPV) ba semua sekula di selampur menua abis laun 14 Februari tu (2022).
Sapit Menteri Pengerai, Datuk Dr Noor Azmi Ghazali madah, pengawa muka PPV tu dikena ngelancharka agi Program Vaksinasyen Covid-19 Nembiak (PICKids) beumur lima ngagai 11 taun.
“KKM ngandalka 70 peratus nembiak ba menua tu nerima vaksin laban penyampau nya bisi nurun ke sekula.
“Reti iya, pengudah semua sekula tembu bejalaika pengawa meri vaksin, dua juta nembiak Malaysia udah nerima dos keterubah sida ba timpuh dua bulan tu.
“Nya kebuah, fokus PPV deka dipejalai ba semua sekula laban nya deka ngemuntangka agi vaksinasyen kelebih agi ungkup nembiak Primari Satu ngagai Lima ngambi nadai begintir,” terang iya.
Azmi mansutka jaku nya pengudah ngabas pengawa bejalaika PICKids di Klinik Pengerai Batu Kawa, kemari.
Ngelansa silik, iya madahka KKM deka mansutka sebengkah penerang sehari tu pengudah aum Raban Staf Khas Vaksinasyen Covid-19 Nembiak (CITF-C) pasal pejalai program nya.
“CITF-C deka nerang pasal #PICKids di renggat sekula. Pengawa rejister mega deka dipejalai ba sekula seraya sida ke ngelebus haribulan tau nerima vaksin ba PPV tauka sepital peribit ti dipilih,” ku iya.
Nambahka nya ku iya, perintah semampai betatika pengelikun nembiak taja raban tu enda balat pedis kena rampit Covid-19 tang bisi ke dipasuk ngagai Unit Sakit Raya (ICU) enggau bebadi nyawa.
“Nitihka pansik, 90.7 peratus vaksin nya ngasi. Sida ti kena rampit igi penyakit tau nganu nyawa ari dituchuk vaksin laban nadai balat ngasaika pemedis.
“Ba Amerika, sepenyampau 8.6 juta nembiak udah nerima vaksin lalu semina 11 iku ke bisi pedis tang gerai baru pengudah diperubat,” terang iya baru.
Nangkan nya, iya meransang apai indai rejister anak sida nerima vaksin enggau lengkas laban pengawa tu beguna bendar nentuka menua ulih ngalih ngagai renggat endemik.
Ungkup rikod, PICKids dilanchar kena 3 Februari tu tadi lalu nengah program tu, nembiak beumur lima ngagai 11 taun deka nerima dua dos vaksin betakah lapan minggu pengudah dos keterubah.
Nembiak tu deka nerima vaksin Cominarty ari Pfizer-BioNTech, enggau satu pertiga ari dos ti dikena dalam dos orang besai tuai.
