KABONG: Pukul rata 400 iku nerima vaksin dalam sehari ba Palan Meri Vaksin (PPV) Dewan Balai Polis Kabong ditu.
Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Datuk Ali Biju bisi ngelimpangka awak diri ngabas pejalai Program Betuchuk Vaksin dia.
Ku iya, PPV Kabong berengkah bejalaika program nya kena 14 June tu tadi ke alai penyampau tubuh penerima vaksin deka semampai ditambah.
“Nitihka penerang ari Pegawai Opis Pengerai Pelilih Saratok, Dr Syafiq Ameerul tadi, penyampau sida ti betuchuk vaksin deka ditambah belama ngambi jampat nyapai tagit Imuniti Beraban.
“PPV Kabong udah datai ba hari ke sebelas enggau pukul rata 400 iku betuchuk vaksin ninting hari sekumbang 12 hari udah dibuka.
“Peranak ditu bisi 18,670 iku lalu sida ke patut nerima vaksin 13,254 iku ke alai 2,503 iku beumur 60 taun enggau tuai agi seraya 10,751 iku sida ke beumur 18 taun enggau tuai agi,” ku iya.
Adun Krian nya madah munyi nya maya ngabas enggau meri peransang ngagai Program Betuchuk Vaksin ba PPV Dewan Balai Polis Kabong ditu, ensanus.
